UNA estudia recurrir énte'l Tribunal de la Competencia les ayudes a los promotores de viviendes

Daniel Fernández Blanco, voceru de Vivienda d'Unidá Nacionalista Asturiana, manifestó la sorpresa de los nacionalistes pol alcuerdu ente'l Principáu y los promotores privaos. Dende'l puntu de vista d'UNA nun pue creese que "usen fondos públicos pa que la ciudadanía tenga que mercar pisos un 10% más caros que los de protección oficial" y manifestó que nun tien xacíu que Noemí Martín, conseyera de Vivienda afirme que ye una "política social de vivienda".

Blanco señaló que "si nun fuera pola intervención pública, munches de les viviendes del mercáu llibre tendríen precios perbaxo de los de protección oficial, como yá pasó en Barcelona tal y como apaez reflexao n'Incasol (Institutu Catalán del Suelu)" lo que convertiría a esti tipu d'actuaciones en "unes sovenciones soterraes a los promotores de vivienda llibre, que d'otru mou veríen como baxen los precios d'unes viviendes qu'espoxigaron enforma más que'l so valor de mercáu".

Énte esta situación UNA platégase recurrir al Tribunal de la Competencia "porque la concesión d'estes ayudes que quieren facer pasar por una política social de vivienda nun ye más qu'un mou de sovencionar, de forma illegal, los intereses privaos de los promotores, qu'énte les dificultaes económiques quieren tirar de los fondos públicos, ensin dar esplicaciones de qué ficieron colos increíbles beneficios que tuvieron arriendes del boom inmobiliariu".

Dende UNA táchase d'irónico que "les polítiques de vivienda de la esquierda plural asturiana, seyan el modelu a siguir poles comunidaes gobernaes pol PP como Valencia, Murcia o La Rioxa".

El voceru de Vivienda desixó asina otra vuelta que "nun s'engañe a los trabayadores diciéndo-yos que va reactivase'l trabayu nel sector con estes midíes, porque ésti namás pue reactivase cuando haya nueves espectatives de venta, polo que lo único que va llograr esta midida ye desfacese del stock de pisos de les promotores y de magar esto'l costu financieru venceyáu a esti stock, yá que los promotores tamién construyen a créditu".

UNA propón "fomentar el cooperativismu de vivienda qu'elimina'l sobrecostu"

UNA recordó les llinies que tendríen d'orientar una política de vivienda. Éstes seríen pa los nacionalistes "fomentar el cooperativismu de vivienda qu'elimina'l sobrecostu de los intermediarios, facer un apueste poles nueves promociones públiques que crearíen puestos de trabayu y presionaría a la baxa los precios de les viviendes llibres que siguen hinchaos y sovencionar directamente a les families con más dificultaes p'acceder a una vivienda, avalando asina mesmo a les persones que podríen comprar un pisu pero que nun puen facelo pola restricción de les hipoteques que vivimos anguaño" sorrayó Daniel Fernández.

El voceru de vivienda d'UNA concluyó diciendo que "la nuestra organización va facer tolo posible pa que'l dineru públicu vaya directamente a les persones con dificultaes y non a los que s'arriquecieron d'un mou abusivu. P'algamar esti oxetivu vamos usar toles víes polítiques y xurídiques que tean na nuestra mano".