Gabilondo acuerda con Asturies una inversión de cuatro millones nel programa Escuela 2.0

El ministru d'Educación, Ángel Gabilondo, y el conseyeru d'Educación y Ciencia del Principáu d'Asturies, José Luis Iglesias Riopedre, tan acabante de firmar el conveniu pa la puesta en marcha del programa Escuela 2.0 nel nuesu país, que supondrá una inversión de 3,87 millones d'euros y beneficiará a más de 7.000 alumnos demientres el presente cursu.

   Gabilondo punxo de manifiestu el "carácter especial" de la firma, porque se trata de la primer comunidá onde se pon en marcha'l plan, tal como prometió'l presidente del Gobiernu, José Luis Rodríguez Zapatero, demientres l'Alderique del Estáu de la Nación.

   El ministru recordó demientres l'actu que "nun sólo se trata d'un repartu d'ordenadores", sinón qu'un "cambiu del mou de ver les coses", porque tien que calcar "nel mou d'enseñar de los profesores y el mou de deprender de los alumnos". "Los estudiantes vívenlo con ilusión y naturalidá", remarcó.

   El programa aplicaráse en toles comunidaes autónomes y demientres esta selmana continuarán firmando acuerdos. Gabilondo aseguró que serán flexibles "siempre que se cumpla'l compromisu" del presidente del Gobiernu, porque la dixitalización de los colexos ye mui desigual y adaptaron el plan a les condiciones de les que partíen en caúna de les rexones del país.

FORMACIÓN A DOS DE CADA TRÉS PROFESORES

   Iglesias Riopedre, pela so parte, esplicó que, en febreru, tolos alumnos de quintu de primaria tendrán un ordenador  y, nos próximos años escolares ampliaráse hasta Segundu de la ESO. Añadió que tamién dos de cada trés profesores recibirán formación, que tomarán pizarres dixitales y cañones pa los cnetros y instalarán conexón Wi-fi en tolos colexos, polo que supondrá "un avance significativu" pa la educación.

   Tamién informó de que tanto l'accesu a ordenadores como la formación del profesoráu afectará tanto a colexos públicos como privaos, mientres que la conexón Wi-fi, los cañones y les pizarres dixitales dirán destinaos sólo pa la escuela pública.

   Esperen poder repartir los ordenadores en 100 centros en xineru y el restu en febreru, porque una comisión deberá determinar qué empresa sirve los ordenadores, al traviés d'un espaciu de concurrencia pública en función del preciu y les prestaciones qu'ofreza caúna.