Xeira súmase al contenciosu de la Coordinadora Ecoloxista contra'l parque eólicu de Carondio

Dende l'Asociación Cultural Xeira conseñen que "fiel al so compromisu col patrimoniu cultural y ecolóxicu del occidente asturianu, apoya'l contenciosu alministrativu qu’acaba d'entamar la Coordinadora Ecoloxista d’Asturies contra'l Plan Especial del Parque Eólicu Sierra de Carondio" que s’aprobó en setiembre d’esti añu.

El proyectu quier asitiar 25 aeroxeneradores (molinos de vientu), de 60 metros d’altura caún, na Sierra de Carondio, coles correspondientes pistes, tendíos de torres y cables pa evacuar la enerxía. Segun afita Xeira la "Serra de Carondio, que los conceyos d’Ayande y Eilao venden como paisaxe protexíu, ensin ser cosa tala llegalmente, tien el mayor conxuntu de megalitos d’Asturies, con 34 yacimientos censaos, ente los que rescamplen la famosa Llastra da Filadoira, na Campa Entarríos". Nesa sierra tán amás "los restos d’un campamentu romanu (Moyapán) y d’un camín antiguu como La Carreiriega de los Gallegos, aparte d’una braña, la de Campel, auténtico iconu turísticu. Tou esti patrimoniu arqueolóxicu ta protexíu por llei y escluyíu espresamente nes Directrices del Principáu d’Asturies del 2008 pal aprovechamientu eólicu". Señalen asimesmo qu'a pesar d’esta esclusión, la Conseyería d’Industria y los conceyos d’Ayande y Eilao aprueben el Plan d’instalación d’un parque que, "evidentemente, ye incompatible cola conservación d’esa riqueza".
 
Finalmente Xeira conseña que "l'occidente asturianu ta convertiéndose nun monocultivu de molinos de vientu basándose na idea del beneficiu rápidu por pequeñu que sía, ensin dar más hipotecar el futuru, que tien que basase nuna medría sostenible qu’aproveche los recursos naturales pal sector agropecuariu y de servicios. El modelu actual, cola escusa de que son enerxíes renovables, llévanos al despoblamientu y a la venta al por mayor del nuesu patrimoniu. El parque eólicu de Carondio ye un símbolu d’esa ceguera y hai que paralo".