Bual va celebrar el so "Outono Cultural"

L'Asociación Xuvenil “Mezá” entama la segunda edición d’estes xornaes culturales nel conceyu de Bual. Les actividaes van separtase en dos díes, el 14 de payares y el 5 d'avientu. Nel primer d'ellos va desendolcase la charla de dos historiadores, Esperanza Martín y Fernando R. del Cueto, col títulu de “El trabayo d’arqueólogo nel occidente d’Asturias”. Va ser a les seis de la tarde. Esi mesmo día, a les 20:00 hores, va celebrase un conciertu del cantautor turonés Alfredo González.

Nel segundu y últimu día va tener llugar la conferencia de los espertos en cultura tradicional Xosé Antón Fernández Ambás y Guillerme Ignacio Costa titulada “A tradición oral en Asturias y Galiza: culturas ermás”. Esti actu av ser a les 18:00 hores. Darréu, a les 8, va haber un conciertu del grupu de folk local "Mezá". Tolos actos van ser na Casa da Cultura de Bual.

Según la organización "anque esti añu l'Asociación Xuvenil Mezá tuvo verdaderamente difícil la organización de les xornaes al nun cuntar con nenguna aportación económica per parte del Gobiernu asturianu y al recibir una ayuda menor de los establecimentos collaboradores de Bual y alredores, nun hubo contratiempos abondos como p'aparar les úniques espresiones culturales que s’entamen nesti conceyu occidental".