La Xunta de Personal Docente afala acelerar los planes de formación del profesoráu de gallego–asturiano

La Xunta de Personal Docente non Universitariu d'Asturies, aconceyada ayer, aprobó ente otres resoluciones el sofitu al plan d'estudios p'algamar el Minor en Llingua asturiana, propuestu pola Facultá de Filoloxía de la Universidá d'Uviéu, asina como otra resolución na que se pidi l'aceleración de los planes de formación del profesoráu de gallego–asturiano pa poder atender "les necesidaes docentes que continuamente surden nesta especialidá".

Asimesmo otra resolución fala sobre la “Ley de Reconocimiento de la función docente” que recientemente presentó'l gobiernu asturianu a les organizaciones sindicales, una y bones anulada xudicialmente la carrera profesional del personal docente. La Xunta de Personal refuga esti proyectu de llei que quier afitar distintes categoríes ente'l profesoráu d'idéntica esperiencia pa "consumar la división dientro de los cuerpos docentes", y desixe'l "pagu de les cantidaes adeudaes a tol profesoráu que cumplía o pasa a cumplir el requisitu de 5 años d'antigüedá con efectu retroactivu". Nesti sentíu aprobóse entamar una campaña de movilización "contra la discriminación salarial y contra la división del profesoráu".