Los ecoloxistes denuncien l'ampliación del basureru de Cogersa

Dende la Coordinadora Ecoloxista denuncien que "se machaca a los ciudadanos conque'l basureru de residuos urbanos de Zoreda acábase, cuando compruébase fácilmente esta falsedá con una vista aérea de les instalaciones, la disposición de terrenos que tien Cogersa alredor".Segun la CEA "hai que recordar que'l complexu de Zoreda ocupa terrenos de Xixón, Carreño y Llanera y Cogersa y tien terrenos abondos pa tirar de forma afayaíza los residuos urbanos non aprovechables agora y los de munchos años más".

Según los ecoloxistes "lo que se agota ye'l frente de vertíos, pero non el basureru onde hai un gran complexu de tratamientu autorizáu, amás de delles instalaciones complementaries, ente elles otros 3 basureros amás del de residuos urbanos". Acordies colos datos asoleyaos na memoria de Cogersa del 2008 entraron en Zoreda 527.833 tonelaes/añu de Residuos Sólidos Urbanos, d'estes 466.362 tonelaes fueron llevaes al basureru, porque "hai que recordar que tenemos una de les tases más pequeña de reciclaxe d'España, que nun algama'l 10%".

La Coordinadora Ecoloxista recuerda que "tiramos al basureru 200.000 tonelaes de fracción orgánica fácilmente biometanizable, tamién tiramos ensin reciclar papel, vidriu, plásticos y testil que suponen otres 180.000 tonelaes que deberíen reciclase".