Valledor diz que la parte socialista del Gobiernu "da la espalda" al Parlamentu al nun cesar al presidente d'El Musel

El diputáu d'IU-BA-Verdes, coalición que ye socia del PSOE nel gobiernu asturianu, Francisco Javier García Valledor, dixo güei que la parte socialista del Executivu rexonal ta "dando la espalda" a una resolución aprobada pola Xunta Xeneral del Principáu d'Asturies al nun cesar del so cargu al presidente de l'Autoridá Portuaria de Xixón, Fernando Menéndez Rexach.
 
Valledor fizo estes manifestaciones na intervención que realizó güei na Comisón de Mediu Ambiente-Ordenación el Territoriu y Infraestructures de la Xunta Xeneral del Principáu, previa a la votación del cumplimientu de la Moción 21/VII, de 17 d'ochobre del 2008, sobre política xeneral en materia de puertos d'interés xeneral del Estáu n'Asturies, na que PP y IU-BA-Verdes pidieron al Gobiernu del principáu qu'apartare del cargu, darréu, a Menéndez Rexach, pola xestión de les obres d'ampliación d'El Musel (Xixón), qu'acumula un escesu de coste de 251 millones.
 
"Nun ye'l Gobiernu'l qu'incumple la moción, sinón la mayoría socialista, y en concreto quien ta asumiendo la responsabilidá política: el presidente del Principáu, Vicente Álvarez Areces", sorrayó Valledor.
 
Dixo nun entender por qué'l propiu Areces y el conseyeru de Mediu Ambiente, Ordenación del Territoriu y Infraestuctures, Francisco González Buendía, asumieron dende'l primer momentu y "en primer persona" la responsabilidá de la xestión de les obres.
 
Valledor recordó les razones que llevaron a solicitar el cese de Rexach, y dixo que la xestión y l'escesu causó "rocees" importantes en rellación a les repercusiones que puen tener les fórmules de financiación, dao que s'optó por una fórmula de préstamu que "hipotecará" el futuru d'El Musel.
 
Asina, el votu de Valledor y los cinco votos del PP, frente a los seis del PSOE, ficieron que la Comsión declarare güei "incumplida" la moción del Parlamentu, d'acordies col artículu 117 del reglamentu de la XXPA. Esti puntu señala qu'en Comisión entenderáse que nun existe empate cuando la igualdá de votos, siendo idénticu'l resultáu nel que tuvieren votao tolos miembros de la Comisón pertenecientes a un mesmu Grupu Parlamentariu, pudiere decidise emponderando'l númeru d votos con que cada grupu cuente nel plenu.
 
Pela so parte, el voceru del PP, Agustín Cuervas-Mons, dixo que'l pidimientu de cese de Menéndez Rexach tien hasta más sen güei qu'hai un añu, porque hai qu'exixir responsabilidaes. "Nun pue ser qu'haya 251 millones que fueren al fondu de la mar y equí naide tenga responsabilidaes; ye una llocura", afirmó.
 
"ESCURES RAZONES"
 
 
Esplicó toles "predicciones" de Rexach sobre l'ampliación y dixo que'l presidente de l'Autoridá Portuaria llegó a negar qu'existiere un escesu de coste y que dempués "tapeciólu" el Conseyu d'Alministración. "Sigue nel cargu quien xeneró'l problema", sorrayó.
 
Cuervas-Mons mostróse sorprendíu de que'l Gobiernu asturianu defienda "a capa y espada" a Rexach, que foi'l que tuvo al frente del "desastre" de la xestión de l'ampliación del Puertu. "¿Qué escures razones hai pa defender lo indefendible?", entrugóse
 
Pal PP asturianu, el Gobiernu del Principáu ta "en rebeldía" ante la Xunta Xeneral del Principáu d'Asturies, al incumplir la moción. L'Executivu "pasa" del Parlamentu, según el PP, qu'añadió que l'incumplimientu de la moción ye una "burlla".
 
ÁMBITU
 
Pela so parte, el diputáu del PSOE, Faustino Álvarez, mostróse contrariu a les postures de la oposición y dixo que la moción ta cumplida pol Gobiernu del Principáu, dao que l'Executivu dio conocencia al Gobiernu central de la moción al traviés de la Delegación del Gobiernu.
 
De fechu, pa Faustina Álvarez, tanto PP como IU-BA-Verdes equivóquense d'ámbitu a la hora de pidir el cese de Rexach. Asina, dixo que'l nomamientu del presidente de l'Autoridá Portuaria depende de que se publique nel Boletín Oficial del Estáu, y poro correspuende al ámbitu estatal. "Nun compete a esti parlamentu pidir a José blanco un cese", apuntó.
 
Asina, acusó al PP de tentar d'asitiar a la Xunta "fuera de la regularidá alministrativa", una circunstancia que, añadió, nel PP conocer porque yá presenten les iniciatives referentes a esti puntu nel Congresu de los Diputaos.
 
Sicasí, esta argumentación del PSOE molestó a les files del PP y Cuervas-Mons mostró a la Cámara'l Boletín Oficial del Principáu d'Asturies (BOPA), de 13 de mayu del 2004, pol que'l Gobiernu del Principáu nomaba a Rexach. Poro, dixo que tamién depende d'él el so cese, teniendo en cuenta la Llei de Puertos.
 
Nel citáu acuerdu del Conseyu de Gobiernu rexonal, señálase que correspuende a la Comunidá Autónoma la desginación y separación del presidente de l'Autoridá Portuaria de Xixón. Na mesma llinia, Valledor dixo que según la llexislación vixente, ye'l Gobiernu rexonal el que tien la capacidá de cesar a Rexach.