NaBai presenta una enmienda pa exixir la cooficialidá del eusquera en tol territoriu navarru

Nafarroa Bai presentará mañana una enmienda a la modificación de la Llei Foral del Vascuence pa exixir la cooficialdiá de les "dos lllingües propies de Navarra", l'eusquera y el castellán, "en tol territoriu foral". En casu de que se refugue, presentará una segunda enmienda pa que la zona mista s'amplía de manera qu'incluya llocalidaes como Sangüesa, Viana, Tafalla y Mendigorria, ente otres, nes que la ciudadanía dio muestra de que quieren pertenecer a la mesma.
 
La parlamentaria de Nafarroa Bai, María Luisa Mangado, esplicó esta mañana en rueda de prensa que la coalición presentará una enmienda de sustitución a la propuesta d'IUN d'ampliar la zona mista a diez conceyos. Asina, NaBAi reclamará la cooficialidá del eusquera y el castellán en tol territoriu, pa que d'esta manera s'acabe cola zonificación llingüística de la Comunidá.
 
N'opinión de la coalición nacionalista, la enmienda presentada pol grupu parlamentariu d'IUN que contempla ampliar la zona mista a diez nuevos conceyos ye "más qu'escasa", pero Mangada precisó que l'apoyarán en casu de que les enmiendes presentaes pola so formación nun cuenten con apoyu bastante del restu de grupos y salgan refugaes.
 
María Luis Mangado, que compareció xunto a les parlamentaries de NaBai, Paula Kasares y Nekane Pérez, insistió en que la zonificación llingüística "nun tien nengún sen", cuando "cada vez con más normalidá tamos falando de la ventaniella virtual y l'Alministración tiende a ufiertar información, tramitaciones y hasta servicios mediante les sos páxines web".
 
Pa Nafarroa Bai, caltener la zonificación na Comunidá foral ye "caltener una torga" y la "imposición de nun poder elixir", polo que la parlamentaria de la coalición nacionalista volvió mostrar el so refugu a la llei del euskera, "tal y como se redactó en 1986 y que sigue redactada nesti momentu, 23 años más tarde".