Cascos denuncia al PP de Xixón por tirar a la basoria'l so archivu personal, qu'alcontró un vecín n'abril

L'ex ministru de Fomentu, Francisco Álvarez Cascos, denunció ante l'Axencia Española de Proteición de Datos al PP de xixón por tirar a la basoria un archivu que contenía datos personales suyos. Los documentos atopólos el pasáu mes d'abril un vecín de Xixón nun contenedor d'escombrios asitiáu na acera de la sede de los populares.
 
Asina lo recueyen güei dellos diarios asturianos, qu'añaden que l'abogáu de Francisco Álvarez Cascos considera que l'actuación de la xunta llocal del PP de Xixón pue ser constitutiva d'una irregulardiá "mui grave".
 
Ente la documentación atopada na basoria, taben delles cartes con Fraga Iribarne, col que fuere presidente del Gobiernu de la República española nel exiliu, Claudio Sánchez Albornoz, amás de comunicaciones con responsables municipales y hasta correspondiencia de carácter familiar. L'archivu pertenez a los años 1979 y 1980.