La casa del Padre Galo en Valdés acueye la primer Xunta d'Escritores en Llingua Asturiana

La casa natal del Padre Galo (Fernán Coronas), en Cadavéu (conceyu de Valdés), acoyerá esti sábadu la primer Xunta d'Escritores en Llingua Asturiana, qu'entamen conxuntamente l'Ayuntamientu y la Dirección Xeneral de Política Llingüística de la Conseyería de Cultura. L'eventu axuntará a dellos importantes nomes de la lliteratura asturiana p'aldericar y trabayar alrodio de la escritura y la llectura de testos llilterarios n'asturianu, amás de valir d'homenaxe a los escritores llocales Padre Galo y Nené Losada.
 
Tres les presentaciones, les actividaes entamarán a les once la mañana con una ponencia ofrecida pol miembru y secretariu de l'Academia de la Llingua Asturiana, Roberto González Quevedo, baxo'l títulu 'Pol camín del Padre Galo'.
 
Dempués celebraránse trés meses de trabayu sobre la escritura n'asturianu (pola escritora y académica Esther García López), la edición n'asturianu (pola escritora y profesora Carmen Guardado Parga) y la llectura n'asturian (por Cristina Álvarez y Santiago Pérez, directores de les cases de cultura de L.luarca y Tinéu).
 
Dempués tendrá llugar una ponencia sobre la 'Lliteratura en Llingua Asturiana na construcción de l'Asturies del sieglu XXI', per parte del escritor Xosé Nel Riesgo, siguida pola llectura de les conclusiones de les meses de trabayu.
 
La xornada acabará a les 19.00 hores col actu de pieslle, nel que tendrán llugar ambos homenaxes a Nené Losada y al Padre Galo.