El Tren de la Memoria parará'l sábadu en Mieres, Trubia, Uviéu, El Berrón y Xixón, pa conmemorar la Revolución del 34

La Fundación La Izquierda d'Asturies organiza esti sábadu día 24 una actividá conmemorativa de la revolución d'ochobre del 34. Trátase d'un Tren de la Memoria que saldrá de Mieres y dirá parando en Trubia, Uviéu y El Berrón, hasta llegar a Xixón, nun trayectu que pretende poner en valor la llucha de los trabayadores nun episodiu que "tuvo una relevancia mundial".
 
El Tren de la Memoria presentólu güei na parada de Feve d'Ablaña, en Mieres, el presidente de la Fundación la Izquierda d'Asturies, Manuel García Fonseca, el coordinador xeneral d'IU d'Asturies, Jesús Iglesias, el coordinador d'IU de Mieres, Luis Álvarez Payo, y el responsable d'Organización d'IU d'Uviéu, Adolfo Saro. Toos destacaron la importancia y la relevancia d'esta cita cola historia y cola memoria.
 
Tamién va haber espaciu pa la Cultura, dao qu'escultores como Adolfo Manzano, poetes como Xuan Bello o músicos como Roberto Serrano confirmaron la so asistencia a una cita na que tamién tarán presentes el diputáu d'IU Gaspar Llamazares, y otros nomes destacaos de a cultura y la sociedá asturiana, como Vanesa Gutiérrez, Ricardo Menéndez Salmón o Xuan Cándano.
 
Según esplicaron los organizadores d'esta cita, yá nun hai billetes pa esti tren especial, que saldrá dende la estación de Feve de Mieres a les 10.30 hroes y llegará a Xixón a les 15.15 hores. Demientres esti trayectu, va haber tiempu pal alderique sobre la llei y la memoria, la presentación de llibros, los recitales y la música, dalgo de lo que tamién podrán disfrutar los que s'averen hata les taciones onde parará esti tren, que prevé abrir les sos puertes en cada parada pa facer partícipes a tolos que lo deseen d'esta iniciativa cultural o histórica.
 
Tolos presentes na presentación d'esti Tren de la Memoria calcaron na bona respuesta que recibió esta actividá que pretende, destacó García Fonseca, "recuperar la memoria y facer del pasáu dalgo real". Pela so parte, el coordinador xeneral d'IU d'Asturies, Jesús Iglesias, calcó na necesidá de recordar lo que foi "un fechu históricu" n'Asturies y ver "el so reflexu na Asturies de güei, con voluntá de cambiu y superación de les desigualdaes".
 
Pela so parte, Álvarez Pelayo recordó que nel so momentu, n'ochobre del 34, un tren salió de Mieres y fizo una parada n'Ablaña, onde güei presentóse esta actividá, pa recoyer a cientos de trabayadores que se treslladaben a Uviéu. De fechu, toos señalaron que se trata de llevar esti tren per llugares "que llogaron incluyise na memoria colectiva d'un pueblu".