Batasuna estudia abrir una etapa "sin nenguna violencia"

Batasuna ta plantegando a les sos bases la posibilidá d'abrir una etapa "sin nenguna violencia nin metedura esterna" tres evaluar el periodu trescurríu dende'l fallíu procesu de negociación col Gobiernu de José Luis Rodríguez Zapatero, un periodu analizáu dende la "autocrítica" polos problemes de "cohesión interna" de la 'izquierda abertzale'.
 
Según recueye na so edición de güei'l diariu 'Gara', la direición de Batasuna desarrollare un documentu que consta de 36 fueyes p'abrir un procesu d'alderique internu que posibilite una "estratexa eficaz" pa la izquierda 'abertzale'. Sicasí, el periódicu vascu nun precisa en nengún momentu si esta propuesta de "cambiu de ciclu", que ve la lluz una selmana dempués de que la Policía detuviere a Arnaldo Otegi y a otros dirixentes de la formación illegalizada por tentar de reestablecer la Mesa Nacional cumpliendo ordes d'ETA, ye anterior o non a estos arrestos.
 
A pesar de la "ofensiva estatal", Batasuna diz tar convencida de qu'Euskal Herria ta na "llende del cambiu políticu", polo qu'apuesta por "definir una estratexa eficaz que lleve la confrontación a los términos Euskal Herria/Estáu". "Un procesu democráticu que tenga como base la palabra y la decisión de la ciudadanía vasca" y que, según la propuesta inicial, debería llegar a desarrollase "sin nenguna violencia nin metedura esterna".
 
El documentu, según l'adelantu que fai del mesmu'l diariu 'Gara', ta "impregnáu d'afirmaciones autocrítiques" no referente a la rotura del procesu de negociación política nel 2007. "Al paecer", caltién la formación illegalizada", "nun mos dimos cuenta bastante de por qué y pa qué abrimos el procesu democráticu. Nun mos dimos cuenta de que nun yera pa dar dalgunos pasos y pa poner, sin más, dalgunes bases pa otra ocasión. Nun interiorizamos bastante que ye hora de dar calce al cambiu políticu y qu'eso oblígamos a cambiamos a nosotros mesmos".
 
Batasuna caltién el tonu críticu al llamentar la falta de movilización social demientres el fallíu 'procesu de paz' col Gobiernu de José Luis Rodríguez Zapatero. "Por mor de la falta de cohesión y de los diferente criterios, a lo llargo del procesu la izquierda 'abertzale' cambió'l so diseñu, dando la espalda a l'acumulación de fuerces y colocando'l factor de la negociación nos parámetros d'Argel (lluchar armada a cambiu del marcu democráticu)", según recueye'l citáu testu.
 
La movilización de la ciudadanía ye capital na nueva estratexa que, según el documentu de Batasuna, apostaría por reagrupar a la izquierda 'abertzale' cola idea de conformar "un bloque qu'aconceye a los independentistes", de manera que se cree una "muria popular" frente a les "agresiones y la metedura estatal". La estratexa tamién contempla la escarcelación de presos y "reconstruyir la negociación".
 
Pa ello, Batasuna remarca la importancia de volver a la llegalidá pa dar mayor fuerza al nuevu procesu, nel que nun se cita la llucha armada. "La unidá poular tien que ser la casa de tolos independentistes d'izquierdes", según la proppuesta, "ye l'axente principal na llucha de mases y la llucha institucional. Ye'l principal representante de la izquierda 'abertzale' p'algamar l'acuerdu políticu na actual fase política".
 
MAYOR DEMANDA DE SOBERANÍA EN CATALUÑA Y PAÍS VASCU
 
Nel escenariu actual, Batasuna ve oportunidaes "concretes" y "oxetives" pa qu'esti procesu puea salir alantre --considera que son les mesmes que dieron pasu a la propuesta d'Anoeta del 2004, según Gara--, anque alvierte de que si nun s'aprovechen "podríen entamar a perdese".
 
Ente elles, cita les mayores demandes de soberanía en Cataluña y Euskadi, l'acabación del 'estatutismu' nel País Vascu, la perda de la hexemonía histórica del PNV y la unidá d'aición llograda nel País Vascu francés.
 
De la mesma manera, según 'Gara', alude tamién a una actitú favorable a un procesu de negociación, la mayor fuerza de la demanda del derechu d'autodetermín y el cambiu políticu o'l fechu de que, con "matices", la mayoría sindical coincida col diagnósticu de la izquierda 'abertzale'.
 
El "crack de la globalización neolliberal y el modelu basáu na especulación", el mou en que fuerces progresistes llegaron al poder en munchos países de Llatinoamérica al traviés de l'acumulación de fuerces interclasistes o l'aumentu de propuestes independentistes que s'asumieron como válides n'Europa o en Quebec son otres de les oportunides que ve Batasuna pa sacar alantre'l procesu.