Alimerka duplicará'l númeru de supermercaos pa tornar nun grupu de distribución nacional

El presidente del Grupu asturianu Alimerka, Alejandro Fernández, anunció güei que la cadena buscará duplicar los 174 supermercaos colos que cuenta nesti momentu pa tornar nos próximos años nun grupu de distribución nacionales y rentabilizar asina los casi 60 millones d'inversión que destinó al so nuevu centru lloxísticu, nel conceyu de Llanera.
   Nuna visita a los periodistes poles instalaciones, que "tarán operatives dafechu nun plazu d'un mes", Fernández sorrayó que'l grupu esperimentó un crecimentu de casi un 4 por cientu nel 2009. Unes cifres que calificó de "mui positives" nun contestu económicu como l'actual, marcáu, dixo, pol descensu de los precios.
   Construyíu sobre una parcela de 117.000 metros cuadraos, el nuevu centru lloxísticu ocupa una superficie de casi 50.000 metros cuadraos, frente a los 16.000 metros qu'ocupen les antigües instalaciones y supunxo una inversión superior a los 57 millones d'euros. "La segunda inversión privada na rexón per detrás de la d'Hidrocantábricu", apuntó.
   La inversión, a la que se refirió como "una clara apuesta de futuru", va dir acompañada amás de la creación de 50 nuevos puestos de trabayu nel Centru Lloxísticu nel plazu d'un añu, que se sumará a los 750 actuales y que podría algamar los 2.000 nel mediu palzu. Unos emplegos a los que diba haber de sumar, amás, los derivaos de l'abertura de nuevos supermercaos, a razón de 12 añales, nel 2009 y el 2010.
   Según esplicó'l so presidente, el grupu, que nesti momentu cuenta con 174 supermercaos n'Asturies, Galicia y Castiella Lleón, siguirá creciendo con más intensidá nesta última comunidá col oxetivu d'algamar los casi 400 centros nel futuru.
   El centru lloxísticu qu'entrará en funcionamientu nes próximes selmanes consta de dos naves de 39.947 y 6.159 metros cuadraos caún. La primera acoyerá oficines, productos imperecederos, frutes y verdures, carne, charcutería y pescáu, mientres la segunda ta destinada a la ellaboración de pan y productos de bollería, con una capacidá de producción de seis millones de barres de pan al mes.
   Amás, en función de les característiques del productu que se manipula, la plataforma se subdivide en cinco sectores destinaos a productos secos o sin necesidá de conservación, frutes y verdures, charcuetería y pescáu, mientres la segunda ta destinada a la ellaboración de pan y productos de bollería, con una capacidá de producción de seis millones de barres de pan al mes.
   Na zona posterior de la nave s'asitia un depósitu propiu de combustible pa los 24 camiones qu'integren la flota del Grupu, una subestación de cuatro megavatios, dos depósitos d'agua pa la estinción de posibles incendios, un centru de separación y tratamientu de residuos, llavaderos y una depuradora pa les agües residuales.
   En cifres, la plataforma permitirá trabayar con un movimientu de 24 millones de kilgramos de carne al añu y 14 millones de kilos de pescáu. L'área d'almacenaxe de la nave de panadería y bollería tendrá una capacidá pa 120 tonelaes de fariña y permitirá la producción de 6.000 kilogramos de masa a la hora.
   Alimerka constituyóse en 1986 con capital íntegramente asturianu. Nesti momentu, ta formáu por cuatro empreses --Supermercaos, Distribución, Codefrut y Mases Conxelaes--, qu'emplegen a más de 5.500 persones ente Asturies, Galicia y Castiella Lleón.