Celébrase un congresu sobre Asturies na Universidá de Chicago

Esti domingu 18 na Universidá de Chicago va celebrase un congresu tituláu “Asturies y los asturianos na historia: pasáu, presente y futuru”.  El propósitu d’esti congresu ye, según citen los organizadores  “rescatar del escaezu la vida y obres d’escritores, pintores, filósofos, científicos, llexisladores,… d’orixe asturianu” .

Entre les sos ponencies encontramos trabayos sobre la llingua asturiana o la figura de Don Pelayo. Otra mesa va facer un repasu pola Asturies del sieglu XIX recordando, entre otros, la obra y vida d’Enriqueta G. Rubín, Xosefa y Gaspar de Xovellanos. Tratándose d’un eventu a celebrar n’América  nun podíen quedar fuera ponencies relatives  la diáspora asturiana n’América o a fechos d’aventureros como Pedro Menéndez d'Avilés. Una parte importante del mesmu sirvirá pa conmemorar el 75 aniversariu de la Revolución d’Ochobre del 34 a traviés de la estaya titulada “Narrativa de la revolución social del sieglu XX”, onde s’estudiaran delles obres lliteraries  sobre esta dómina de la nuesa historia.

El congresu ta organizáu pol Spanish Graduate Students Committee, na persona de Jorge Abril Sánchez y ta entamáu pol  The Franke Institute for the Humanities  de la  Universidá de  Chicago, contando cola collaboración de l’Academia de la Llingua Asturiana y del Principáu d’Asturies.
 
Toes estes conferencies y meses tarán impartíes por profesores de la Universidá d’Uviéu y de delles universidaes norteamericanes. Los ponentes son María José Alvarez Faedo, Ramón d'Andrés, Luis Francisco Cuesta, Helena Carretero Suárez, David Arbesú, Jorge Abril Sánchez, James D. Fernández, James W. Fernández, Taresa Fernández Lorences, Ignacio Fernández Sarasola, Lucía Fernández Secades, Santiago García Castañón, Próspero N. García, Chechu García, Verónica González López, Cristina Guijarro Cazorla, Alrick C. Knight Jr., Oscar O. Santos-Sopena y Alexander Selinov.
 
Ver programa del congresu