A los empresarios asturianos prestaría-yos una operación na que Caxastur comprare Caja Castilla La Mancha

El presidente de la Federación Asturiana d'Empresarios (FADE), Severino García Vigón, punxo en valor güei la capacidá "cualificada" del presidente de Caxastur, Manuel Menéndez, y dixo qu'una hipotética operación qu'incluyere la compra de Caja Castilla La Mancha (CCM) sería positiva. "Si se materializa, fenomenal", señaló.
 
Enantes de participar nun actu n'Uviéu y a entrugues de los periodistes sobre una hipotética operación nesi sen, Vigón sorrayó que nun tien datu dalgún sobre'l procesu y espresó'l so enorme "respetu" ante compres, fusiones o ventes, pa nun realizar "apreciaciones llixeres", dao qu'en munchos casos el bon fin de les operaciones básase na da "discrecion".
 
De toes formes, pa Vigón, lo importante ye "entrar na quiniela" pa comprar una Caxa como CCM qu'amás foi oxetu d'un procesu de reestructuración, lo que significa qu'enantes de la compra yá ha tar "saniada". Consideró asina importante qu'una entidá como Caxastur, d'una comunidá pequeña, mereza esti tipu de consideranza y "atrévase".
 
"Compraríase una entidá colo bono, prescindiendo de tolo malo, colos saniamientos puestos en serviciu al respeuto", señalo Vigón.
 
Per otru llau, y entrugáu sobre les posibilidaes de les empreses asturianes nel actual contestu, Vigón insistió en que resulta "obligao" salir de les fronteres naturales en busca de mercamos más amplios. Punxo l'exemplu de Caxastur, o'l de la empresa de tresporte de viaxeros ALSA. "Posibilidaes hai", afirmó.