El conseyeru d'Industria niega que Pymar adoptare formalmente la decisión de vender suelu de Naval Xixón

El conseyeru d'Industria y Emplegu, Graciano Torre, negó güei que la sociedá Pequeños y Medianos Astilleros en Reconversión (Pymar) propietaria de 20.000 de los 60.000 metros cuadraos qu'ocupa Naval Xixón, adoptare nel conseyu d'alministración la decisión de vender esi suelu.
   El responsable rexonal respondió asina ante l'anunciu per parte de Pymar de vender esos terrenos como única opción de furturu pa recuperar parte del dineru invertíu nesi astilleru.
   Torre realizó estes afirmaciones demientres una rueda prensa qu'ofreció güei na Cámara de Comerciu de Xixón, tres caltener un conceyu colos integrantes del Consorcio de Ferias, ente los que destaquen l'alcaldesa de Xixón, Paz Fernández Felgueroso, y el presidente de la Cámara de Comerciu, Luis Arias de Velasco.
   El conseyeru señaló que nel casu de qu'estos terrenos se pongan en venta diba ser una operación normal. "Lo que m'escandalizaba ye que dalguién me diga que Pymar tien intención de regalalos", apuntó.
   Graciano Torre señaló qu'esta cuestión "nun ye un problema d'intenciones". "Cuando Pymar se fizo cargu de bona parte de la deuda de Naval Xixón la garantía yera'l suelu, eso garantiza llegalmente a una sociedá un determináu dineru puestu nun astilleru, y tien que trabayar con rellación a ello, como llei ordena", dixo.
   "Cuando l'Ayuntamientu de Xixón-y dea a los terrenos los usos oportunos, si dalguién lo quier va tener que mercar y Pymar vender. Nun sé que tien d'estraño esi anunciu", añadió'l conseyeru.