La Coordinadora Ecoloxista d'Asturies tresllada a Mediu Ambiente la so "total oposición" a una escollera nel ríu Nalón

La Coordinadora Ecoloxista d'Asturies treslladó al Ministeriu de Mediu Ambiente nel tramite de suxerencies la so "total oposición" al proyectu de la Demarcación de Costes d'Asturies, que baraxa executar la construcción d'una escollera nel ríu Nalón, a l'altura de Monterréi, en Sotu'l Barcu.
   Según indicó la organización en nota prensa, nesa zona'l ríu Nalón presenta un anchor mediu de 85 metros na zona d'estudiu, existiendo una isla natural d'anchor variable (de 12 a 55 metros) nel centru del cauce.
   "Esti estáu actual de la zona d'actuación ye por mor de la dinámica fluvial que se produz nes zones de meandros. La dinámica fluvial vese afectada pola marea al alcontramos dientro de la influencia de la mesma, lo que provoca l'efectu habitual de remansu nel desagüe del ríu, lo que baxa la velocidá favoreciendo los fenómenos de sedimentación, que dieron orixe a la formación y crecimientu progresivu d'esta isla d'altu valor ambiental", esplica.
   Al respeuto, apunta la Coordinadora que'l Ministeriu de Mediu Ambiente estudia "facer  desapaecer"  dicha isla o "facer una escollera de 400 metros". "Dambes midíes supondríen un importante impactu a un llugar d'altu valor natural, como ye esta isla que ta dientro d'un llugar d'importancia comunitaria (LIC) y Zona d'Especial de Proteición pa les Aves (ZEPA), Cabu Bustu-Lluanco, espacios incluyíos na Rede Natura 2000", reseñó.
   Poro, dende'l colectivu ecoloxista defenden "la non realización del proyectu", pa conservar la isla central "tal y como s'alcuentra nesti momentu".
   "La eliminación de la vexetación de ribera y de la isla central perxudicará a la fauna del entornu, ente la que s'alcuentren especies incluyíes en dalgún de los anexos de la Llei 42/2007 de Patrimoniu Natural y de la Biodiversidá", alvierte.
   "Non en baldre, ye una zona con presencia habitual constatada de llondra paleártica (lutra lutra), martín pescador (alcedo atthis) y otres aves acuátiques que puen aprovechar la incomuniación de la isla y la vexetación p'añerar", diz la Coordinadora, al tiempu que señala que tamién afectaría estes obres de manera importante a una especie tan significativa como'l salmón (salmo salar).
   D'esta manera, la Coordinadora Ecoloxista d'Asturies espera que la Demarcación de Costes "se decida pola espropiación de los terrenos afectaos poles inundaciones enantes d'executar les otres opciones que son más cares y de gran impactu nuna zona d'altu valor natural".