Les Cortes d'Aragón debatirán la proposición de llei de proteición y promoción de les llingües propies

El plenu de les Cortes d'Aragón debatirá el xueves 8 d'ochobre, la toma en consideranza de la proposición de llei del Grupu Socialista pa regular les llingües minoritaries de la Comunidá Autónoma, l'aragonés y el catalán.
   L'oxetu de la mesma, según el so primer artículu, ye reconocer la pluralidá llingüística d'Aragón y garantizar l'usu polos aragoneses de les sos llingües propies, como una herencia cultural y histórica que debe conservase. Dalgunos de los aspectos más polémicos del testu son la non cooficialidá de les llingües, asina como la denomación de catalán pa la variante llingüística que se fala en delles zones del oriente aragonés llenderes con Cataluña.
   En casu d'aprobase mañana, la iniciativa tramitaráse pa tornar en llei autonómica.
APOYU D'IU
   El diputáu d'Izquierda Xunida d'Aragón, Adolfo Barrena, anunció qu'apoyará la toma en consideranza de la proposición de llei presentada pol Grupu Parlamentariu Socialista.
   En rueda prensa, el tamién coordinador xeneral d'IU-Aragón sorrrayó qu'una llei d'esti tipu "nun pue ser la d'un partíu". IU presentará delles enmiendes parciales a la proposición de llei al entender que tien aspectos "bastante meyorables", según señaló'l conceyal de Zaragoza y coordinador de la Presidencia d'IU-Aragón, José Manuel Alonso.
   Alonso indicó que "yá toca" regular esta materia n'Aragón dempués de "20 años d'espera", dixo nun entender dalgunes posiciones y prometió aportar "rigor" políticu y científicu a esti alderique, a lo qu'añadió que'IU nun se dexará llevar pol anticatalanismu nin pola "visión de nacionalismu llingüísticu" d'otros grupos.
   Alonso recordó que nun se pue lligar una fala a un idioma en función "de quién gane les elecciones". De la proposición de llei del PSOE, Alonso dixo que ye "bastante meyorable" n'aspectos como la so cientificidá y aeguró que "queda un trabayu importante, sobre too de participación".