El Salón del Cómic de Xixón trai artistes como Russ Heath y una esposición sobre dibuxos del holocaustu nazi

El director del Salón Internacional del Cómic de Xixón, Faustino Rodríguez Arbesú, destacó güei la presencia na edición d'esti añu de dibuxantes como l'americanu Russ Heath, ún de los trés grandes del panorama actual, na so opinión. Tamién destacó la esposición 'Un bon homes, una nueva mirada', que recueye dalgunes de les historietes osbre l'holocaustu nazi. El certame celebraráse del 13 al 17 d'esti mes.
   Arbesú, en rueda de prensa nel Centru de Cultura Antiguu Institutu (CCAI) señaló que'l de xixón ye'l Salón "más antiguu d'Europa", al crease en 1972. De la mesma manera, esclaró qu'esti añu ye la 33 edición, dao qu'hubo dalgunos años en que nun se celebró.
   De la mesma manera, allabó'l trabayu de Heath, al que paxó ún de los grandes creadores del Pop Art, Roy Liechtenstein. Tamién citó la presencia nel certame d'otros autores como Dani Acuña, que según Arbesú ta "pegando fuerte" n'EE.UU, Renee Witterstaetter, Diego Olmos o l'asturianu Ernesto del Castiello, 'Neto', ente otros.
   Sobre la esposición sobre los campos d'estermín nazi, indicó que se trata dende una perspectiva non vista enantes. D'ella faló'l coordinador del eventu, Fernando Cuesta, que calcó en que l'holocaustu ocurrió en plenu corazón européu, "nun hai tantu tiempu nin tán lloñe d'equí", dixo.
   Tamién señaló que ye una bona ocasión pa reflexonar y que nun s'olvide la Historia pa qu'ésta nun se repita. Paralelamente, editóse un catálogu de la muestra, que s'inaugrurá'l próximu sábadu, a les 13.00 hores, nel CCAI, y tará abierta al públicu hasta'l día 17. Na esposición, centrada nos prisioneros españoles, participaron dellos autores, dalgunos d'ellos presentes nel Salón.
   "Toles histories son reales, nun hai nenguna inventada", calcó Arbesú sobre los dibuxos de la muestra, na que tolos personaxes qu'apaecen sufrieron martiriu nos campos de concentración.
   De la mesma manera, inauguraráse'l Salón el día 13, a les 19.00 hores nel CCAI. Nél tendrán cabida otres actividaes como'l cómic en vivu o un cursu d'esti arte pa neños impartíu por Gaspar Meana. Tamién s'entregarán los Premios Haxtur, de referencia yá ente los dibuxantes. De fechu, pue votase al traviés de la Web oficial na quiniela pa elixir los ganadores d'esta 25 edición.
   Arbesú señaló que se foi avanzando muncho na aceptación del cómic, anque llamentó que siga siendo vistu como un arte marxinal. Nesti sen, animó a nun falar de lo que nun se conoz y convidó a lleer tebeos. "Quedaron nel Zipi y Zape", dixo del que critica que puean lleelos los adultos.
   Pela so parte, Vilabrille destacó que'l Salón fizo de Xixón un referente nel mundu del cómic y añadió que "nun ye fácil da-y vida a dalgo demientres 33 años", con alusión a la llarga trayectoria del eventu.