Los impulsores de la fibra óptica y la imaxe dixital ganen el Premiu Nobel de Física 2009

El científicu chinu-británicu-estaounidense, Charles K. Kao, y los estaounidenses Willard S. Boyle y George E. Smith son los galardonaos col Premiu Nobel de Física 2009 poles sos investigaciones que permitieron el desarrollu de les comunicaciones per fibra óptica y de la tresmisión d'imaxes per vía dixital, según informó esti martes la Real Academia Sueca de les Ciencies.
 
Charles Kuen Kao (na imaxe) nació en 1933 en Shanghai (China), tien la doble nacionalidá británica y estaounidense y ye director d'inxeniería de los llaboratorios de telecomunicaciones Standard de Harlow, en Reinu Uníu, y vicerrector de la Universidá de Hong Kong. Llevaráse la metá del premiu (en total diez millones de corones sueques, 975.000 euros) polos sos "innovadores avances sobre la tresmmisión de la lluz en fibres óptiques de comunicación".
 
Pela so parte, Willard Sterling Boyle (nacíu en 1924 n'Amherts, en Canadá, anque de nacionalidá estoaunidense) y George W. Smith, (nacíu en 1930), dambos de los Llaboratorios de Bell de Murray Hill, en Nueva Jersey, repartiránse la otra metá del premiu "pola invensión d'un circuitu semiconductor d'imaxes, el sensor CCD".
 
"Esti añu, el Premiu Nobel de Física galardonó dos avances científicos qu'ayudaron a sentar les bases de les actuales redes sociales de trabayu", afirmó l'Academia sueca nel so comunicáu. Los premiaos "crearon munches innovaciones práctiques pa la vida cotidiana y aportaron nueves ferramientes pa la esploración científica", prosiguió.
 
LA FIBRA ÓPTICA
 
"En 1966, Charles K. Kao fizo un descubrimientu que supunxo una innovación nes fibres óptiques", esplica'l comunicáu. Kao "analizó con procuru cómo transita la lluz al traviés de llargues distancies mediante fribres óptiques de cristal", hasta descubrir que "con una fibra del más puru cristal yera posible tresmitir señales de lluz a lo llargo de cien kilómetros, comparáu colos 20 metros que sólo yera posible tresmitir coles fibres disponibles nos años sesenta", prosiguió l'Academia.
 
"L'entusiasmu de Kao animó a otros investigadores a compartir les sos opiniones sobre'l potencial futuru de les fibres óptiques", afirmó l'Academia. "La primer fibra pura dafechu fabricóse con éxitu sólo cuatro años más tarde, en 1970", añadió l'organismu encargáu de conceder el Premiu Nobel de Física.
 
"Güei, les fibres óptiques formen el sistema circulatoriu que nutre a la nuesa sociedá de la comunicación", aseguró l'Academia. "Estes fibres de cristal de baxa perda faciliten les comunicaciones globales de banda ancha, como Internet", prosiguió. "La lluz pasa al traviés de filos de cristal y llega a la casi totalidá de la telefonía y el tresporte de datos en toles direcciones. Puen treslladase testos, música, imaxes y videu a tol mundu nuna fraición de segundu", añadió.
 
"Si quisiéremos desenredar toles fibres óptiques que circulen pel mundu, algamaríamos un filu de mil millones de kilómetros de llargor, abondo pa circundar el mundu más de 25.000 veces, y sigue aumentando en  miles de kilómetros cada hora", manifestó la Real Academia Sueca de les Ciencies, oranismu creáu en 739 y col oxetivu de "promover les ciencies y reforzar la so influencia na sociedá".
 
LA FOTOGRAFÍA DIXITAL
 
Pela so parte, Boyle y Smith inventaron en 1969 nos Llaboratorios Bell "la primer tecnoloxía con éxitu d'imaxes basada nel usu d'un sensor dixital, un CCD (un dispositivu de cargues eléctriques interconectaes, Charge-Coulple Device)", lléese nel comunicáu.
 
"La tecnoloxía del CCD básase nel efectu fotoléctricu, tal como teorizare Albert Einstein, y polo que se concedió a ésti'l galardón en 1921 del Premiu Nobel. Mediante l'efectu fotoeléctricu, la lluz tresfórmase en señales eléctriques", prosiguió l'Academia. "El restu a la hora de diseñar un sensor d'imaxes yera axuntar y lleer les señales d'un gran númberu d'elementos d'imaxe, de píxeles en pocu tiempu", añadió.
 
Según l'Academia sueca, "el CCD ye'l güeyu electrónicu de la cámara dixital y revolucionó la semeya, dao que la lluz podía, de magar esti momentu, garrase electrónicamente, en llugar de mediante una película". "La forma dixital facilita'l procesu y distribución d'estes imaxes", prosiguió. De la mesma manera, "el CCD utilízase tamién n'abondes aplicaciones méliques, como la toma d'imaxes nel interior del cuerpu humanu, tanto pa diagnósticos como pa la microciruxía".
 
"La semeya dixital tornó nuna ferramienta única n'abondos campos de la investigación. El CCD aportó nueves posibilidaes pa visualizar lo qu'enantes yera imposible ver, y permitióse algamar imaxes clares de los cristales de dellos puntos del nuesu universu y de les fondures de los océanos", acabó.