El director xeneral de Política Forestal, Joaquín Arce, presentó una campaña d'entrega de baldre d'árboles autóctonos en feries, mercaos y nel propiu viveru forestal, pola que'l Gobiernu del Principáu regalará más de 20.000 árboles autóctonos enantes de final d'añu.
 
Arce dio a conocer esta mañana la campaña nel viveru forestal de La Mata (Grau), acompañáu por dos responsables del Programa d'Investigación Forestal y del Viveru Forestal, Juan Majada y Eloy Álvarez. La campaña desarrollaráse a lo llargo del últimu trimestre del 2009 y continuará nel 2010, según informó'l Principáu nuna nota prensa.
 
De la mesma manera, Arce anunció l'entamu d'un programa d'espardimientu y formación forestal qu'incluyirá cursos y práctiques de campu sobre la xestión de la selvicultura del castañu en dellos conceyos de la rexón y la edición de trípticos y manuales.
 
El director xeneral de Política Forestal esplicó que la campaña d'entrega de baldre d'árboles al públicu busca fomentar la plantación de viesques en pequeñes supervicies, ente otres, aquélles que pola so pequeña dimensión nun puen recibir otru tipu d'ayudes a la reforestación.
 
La campaña prevé la entrega de 6.000 bidules, 10.000 cerezales, 2.000 carbayos, 2.000 serbales nel 2009, a los que se sumarán les cerezales, bidules, carbayos, castaños, nozales, serbales, pláganos, umeros, ablanos, fayes, corcheros y fresnos que se distribuyan nel 2010.