L'Ayuntamientu de Xixón reparte esti cursu a 700 alumnos d'asturianu l'axenda escolar, dedicada esti añu a l'Astronomía

El conceyal de Cooperación Internacional y Cultural Tradicional del Conceyu de Xixón, Jesús Montes Estrada, presentó ayeri l'axenda escolar, que nesta sesta edición entregaráse a 700 alumnos de Bachiller y Secundaria, que cursen estudios d'asturianu, una ventena menos que'l pasáu cursu. Frente a esti descensu, en Primaria son 4.090 los estudiantes d'asturianu, que suponen un 54,3 por cientu.
 
Montes Estrada apostó por que Xixón puea tornar nel referente municipal del Principáu n'usu del asturianu, pa lo qu'adelantó que s'entamarán delles iniciatives, empobinaes a algamar la normalización de la llingua, que pasa pela cooficialidá.
 
De la mesma manera, señaló que se desarrollarán nos próximos meses obres de meyora nel Muséu del  Pueblu d'Asturies pa facelo más accesible, como ye'l cambiu d'adoquináu, y tamién l'acondicionamientu del llagu.
 
Xunto al edil tuvo la responsable de la Oficina Municipal de la Llingua, María Xosé Rodríguez López, qu'esplicó que'l descensu d'estudiantes d'asturianu nos cursos de Bachiller y Secundaria débese a la competencia col estudiu d'otros idiomes.
 
Rodríguez esplicó que se trata d'una axenda temática p'afondar nel asturianu, que nesta edición dedícase a l'Astronomía, coincidiendo con que'l 2009 celébrase l'Añu Internacional de l'Astronomía. Les ilustraciones son de Lupe Sabudo y los testos de María Ángeles García. Amás d'a los alumnos, l'axenda repártese a los profesores.
 
Pararlelamente, indicó que cerca de 4.000 escolares participaron el pasáu cursu nes distintes actividaes organizaes pola Oficina Municipal de la Llingua, como talleres de cocina pa educación infantil, lliterarios y de Xixón pa Primaria, o de toponimia pa Secundaria, amás d'alcuentros y esposiciones didáctiques, ente otros.