L'Ayuntamientu de L.lena y l'Academia de la Llingua trabayarán xuntos pa promover l'usu del asturianu

El vicealcalde de L.lena, Agripino Pérez, y la presidenta de l'Academia de la Llingua, Ana Cano, firmó'l pasau vienres un conveniu de collaboración col oxetivu de promover l'usu y la normalización del asturianu nel conceyu, amás de trabayar conxuntamente na dignificación de la llingua.
 
Los puntos incluyíos nesti acuerdu son xenerales pero, ente otres cuestiones, planteguen que l'academia formará parte del conseyu asesor del serviciu de normalización llingüística y aconseyerá y revisará'l trabayu de recoyida d'información rellacionada col asturianu en L.lena.
 
Amás, el Conceyu comprométese a siguir completando la rotulación n'asturianu de los servicios y instalaciones municipales. y de la rede viaria del conceyu y tamién a contar con un representante de l'Academia como xuráu de los premios lliterarios que se convoquen.
 
Campañes de comerciu, hosteleres o iniciatives pa promocionar la llingua ente los más pequeños fueron otres de les iniciatives destacaes por Pérez a la hora de destacar el nivel d'implicación del Conceyu col asturianu. El vicealcalde dexó claro, amás, que toes estes actuaciones son mui bien recibíes polos ciudadanos l.lenense y dexó claro que nel conceyu "ambes llingües conviven con normalidá", polo que pidió qu'esta normalidá se tresllade a una oficialidá real del asturianu.
 
Pela so parte, Ana Cano, a entrugues de los periodistes, tachó de "impresentable" lo asocedío la selmana pasada nel Conceyu de Mieres, cuando un conceyal del grupu muncipal del PP abandonó una Comisión de Cultura porque los espedientes taben n'asturianu. La presidenta de l'Academia de la Llingua pidió que se reflexone sobre "qué pasaría si esto asocediera en Cataluña, Euskadi o Galicia", y entrugóse "cómo reaicionaríen les autoridaes polítiques y la xente", ante un fechu asina.