El Bloque por Asturies entiende qu'una de les causes del recorte presupuestariu anunciáu pol gobiernu central p'Asturies, qu'esti añu recibirá un 9,2% menos de fondos, casi'l doble de la rebaxa media xeneral, débese en primer llugar al "pocu pesu d'esta comunidá na política del Estáu".
 
Asina lo afirmó'l voceru de la formación, Pablo Fernández, demientres una rueda de prensa ofrecida xunto col responsable de  Política Municipal de la organización, Manuel Bidayas.
 
Fernández tien claro qu'Asturies tien "poco pesu nel Estáu" y esta rebaxa ye "ún más de los exemplos que confirmen esta idea", polo qu'entiende qu'esta comunidá necesita "facese valir" nel Gobiernu central.
 
Per otra parte, considera que si'l Gobiernu de José Luis Rodríguez Zapatero reduxo los fondos p'Asturies, "nun foi por una cuestión de perres, sinón por una causa ideolóxica", en referencia a la política neolliberal que, según él, desarrolla'l Partíu Socialista. El mesmu executivo recordó qu'inyectó 150.000 millones d'euros a la banca, que "nun tuvieron efectos nin na sociedá nin nes empreses". "Y sin embargu agora hai recortes pa la economía real", añadió, opinando que "hai una apuesta pola ideoloxía neolliberal".
 
Pa Fernández ésta ye una "mala noticia" porque "cuando Asturies más dineru necesita'l Gobiernu mete tixoria", previendo que la reducción de fondos va retrasar la execución de proyectos como "l'Autovía del Cantábricu, o la Variante del Payares".
 
PLAN A
 
Per otra parte, Vidayas consideró "positivu" el plan A, d'inversión pa la creación d'Emplegu, anunciáu pol Gobiernu asturianu, pero exixó que paralelamente se desarrolle'l sistema de financiación de los ayuntamientos, un tema que "hai que tratar d'una vez". "Los conceyos", señaló, "tán facultaos pa xestionar inversiones, y puen facelo hasta meyor qu'otres alministraciones".
 
Per otra parte, pidió que los proyectos que s'escueyan pa desarrolar con estos fondos seyan los que creen "un mayor númberu d'emplegos" y los más respetuosos col mediu ambiente, amás de que se tenga en cuenta "el compromisu de les empreses col caltenimientu del emplegu de calidá", y que se valore a les qu'incorporen a persones con dificultaes p'acceder al puestu de trabayu, como muyeres o discapacitaos.
 
Nesti sen, Fernández propunxo siete midíes a considerar pa xestionar estos fondos: qu'haya una xestión eficiente y eficaz de los servicios públcios, porque son los que meyor emplegu garanticen, qu'haya una potenciación de les polítique sociales, qu'haya un plan d'austeridá, que se promuevan polítiques de vivienda pública, que se respete'l mediu ambiente como recursu, que participe la ciudadanía na escoyeta de proyectos y que se desarrollen otres polítiques, como la defensa y promoción de derechos sociales y llingüísticos.