Marquen oficialmente al exemplar 1.500 de gochu asturcelta

El conseyeru de Mediu Rural y Pesca, Aurelio Martín, participó güei nos actos de celebración del marcaxe del exemplar 1.500, nel llibru xenealóxicu de gochu asturcelta.
   Na so intervención, Martín recordó que'l so departamentu ta acabante de firmar los convenios triañales coles asociaciones de criadores de races autóctones por valor de casi cinco millones d'euros.
   Martín tuvo acompañáu pol director xeneral de Ganadería y Agroalimentación, Luis Miguel Álvarez. Tamién asistió l'alcalde de L.lena, Ramón Argüelles Cordero, y el presidente de l'Asociación de Criadores de Gochu Asturcelta, Segundo Menéndez.
   Demientres la celebración d'esti actu nuna finca de La Romía (L.lena), el responsable de Mediu Rural y Pesca recordó qu'hai más d'ocho años, en febreru del 2001, la Xunta Xeneral del Principáu d'Asturies, aprobó por unanimidá una moción na que s'encamentaba al Gobiernu qu'adoptare midíes urxentes pa garantizar la conservación de les races de ganáu autóctonu en peligru d'estinción o en situación especial, ente les que s'alcontraba'l gochu asturcelta.
   "Güei tenemos ocasión de celebrar esti actu de marcaxe y constatar que, pese a les dificultaes y gracies a los esfuerzos; la sobrevivencia y recuperación d'esta raza ta más garantizada", señaló'l conseyeru. Nesti sen, Martín sorrayó'l papel que les asociaciones de criadores xugaron na recuperación y el fomentu d'estes races.
   De la mesma manera, el Conseyeru destacó que ta acabante de firmar los convenios triañales coles asociaciones de criadores pa garantizar un marcu estable de financiación a estes entidaes por valor de casi cinco millones d'euros de los cuales, casi 60.000 euros correspuenden al gochu asturcelta.
   "Too ello enmárcase na decidida apuesta d'esta Conseyería por finxar el caltenimientu de la biodiversidá qu'esta raza representa, y la enorme potencialidá económica que la esplotación del gochu asturcelta pue representar nel futuru gracies a los esfuerzos de los 54 criadores que tán detrás d'esti éxitu", acabó'l conseyeru.