El Gobiernu rebaxa la pena de cárcel a los sindicalistes Cándido y Morala de trés a dos años

El Conseyu de Ministros concedió a los representantes de la Corriente Sindical d'Izquierdes (CSI), Juan Manuel Martínez Morala y Cándido González Carnero la rebaxa de la pena de cárcel impuesta de trés a dos, a cambiu del pagu al Conceyu de los 5.624,83 euros d'indemnización pola rotura de la cámara de videuvixilancia demientres les movilizaciones de Naval Xixón y el nun cometer delitu dolosu nel plazu de cuatro años. Pa los dos procesaos, l'indultu ye "otra trampa pa siguir amordazando a la clase trabayadora".
   Pela so parte, Carnero, en rueda prensa na Casa Sindical, quexóse de la indefensión na que s'alcuentra al nun saber si la suspensión de la pena hasta la resolución del indultu que decretó la xuez que sostituyó al maxistráu del Xulgáu de lo Penal 1 de Xixón, Lino Rubio, afecta al tiempu que pasó dende que se-yos concedió'l Tercer Grau. Los dos pasaron na cárcel de villabona 20 díes, enantes de concedése-y el citáu Tercer Grau'l 5 de xunetu del 2007, un día enantes de que-yos suspendieren la pena.
   Morala y Carnero tán citaos pol Xulgáu de lo Penal 1 de Xixón pal próximu día 7, a les 10.00 hores, onde'l maxistráu-yos comunicará si ingresen en prisión, continúen col Tercer Grau o si se suspende la pena, al ser de dos años. "Pensamos que deberíamos tar nel tercer grau", dixo Carnero.
   Esti últimu aseguró qu'agora tán "peor" qu'enantes de salir l'indultu. Los sindicalistes opinen que l'indultu ta "apañáu" pol informe que dictó'l delegáu del Gobiernu n'Asturies, Antonio Trevín, y el Conceyu de  Xixón. "Siempre diximos que yéremos inocentes y que nun se mos dexó defedemos nel xiuciu", apuntó. "Si l'Ayuntamientu nun se da por satisfechu, volveríamos a la prisión de Villabonoa", añadió.
   Amás, criticó que s'aumenta en dos años el condicionante. A esti respeuto, esplicó que la llegalidá diz qu'en dos años si te vuelven garrar nun pasa nada y equí imponen cuatro años, polo que consideró que tán n'indefensión si van a una manifestación y la Policía desea denuncialos. "Tamos condenaos", quexóse.
   De la mesma manera, aseguró que too esto ye un "montaxe políticu institucional" y llamentó que se-yos dexe "nes mesmes manes que mos condenaron nel so momentu", con alusión al Conceyu xixonés y al maxsitráu Lino Rubio, al qu'acusó de condenalos "sin oportunidá de defendemos", y como castigu a les movilizaciones nel sector naval en Xixón.
   Sobre esto último, apuntó a lo oportuno de que llegue l'indultu cuando Naval Xixón pieslla y Juliana ta a un tris de facelo, dalgo que calificó de "llamentable", y atribuyólu a "pretender qu'equí nun se mueva nin Cristo". Carnero señaló que se-yos utiliza como cabeces de turcu pa "amedranar a los trabayadores", y apuntó que l'únicu interés ye'l "pelotazu urbanísticu" en terrenos de los astilleros.
   Pela so parte, un voceru de la Platafomra Contra la Represión y poles Llibertaes, Miguel Ángel LLana, quixo matizar que'l pidimientu d'indultu fízolu la Plataforma xunto a la firma de munchos ciudadanos y non los dos procesaos. Pa Llana, el xuiciu fechu a Carnero y Morala ye una "venganza pa fundir la bahía", y "especualar colos terrenos". Tamién recalcó que si nun se cuenta la suspensión de la condena decretada pola xuez nel so día, agora tendríen cumplío en réxime de Tercer Grau más tiempu del de la condena impuesta pol Conseyu de Ministros.
   Por esti motivu, la Plataforma convocó una concentración pal día 6 d'ochobre, a les 19.00 hores, na Plaza Mayor, pa que'l Conceyu confirme lo dicho de palabra nel so día sobre que los dos imputaos nun teníen nada que pagar. L'impagu d'esa cantidá conlleva tamién una pena de 180 díes de cárcel.