La Llei del Vascuence navarra plantega ampliar la zona de proteición non oficial del eusquera a cuatro conceyos

La Mesa y la Xunta de Voceros de la Comunidá Foral de Navarra decicieron ayeri abrir un plazu de 15 díes pa la presentación d'enmiendes a la proposición d'Izquierda Unida de modificación de la Llei del Vascuence, que plantega l'ampliación de la llamada zona mista, onde l'esquera nun ye oficial, pero sí se reconoz el derechu del ciudadanu y usalu, y pue requerise o valorase como méritu en dalgunos puestos de l'Alministración, de la mesma manera que la Llei de Promoción y Usu del Asturianu.
   La propuesta d'Izquierda Unida de Navarra contemplaba la incorporación de nueve conceyos a esta zona mista. Sicasí, la reforma que saldrá del parlamentu sólo considerará l'ampliación a cuatro: Noain, Beriain, Galar y Aranguren, únicos cuatro ayuntamientos pa los que'l Partíu Socialista de Navarra apoya la proposición. En total pasarán a ser de 48 a 52 los conceyos consideraos zona mista.
   Nella, reconozse el derechu de los ciudadanos a usar l'eusquera y pue exixise pa dalgunos puestos de l'Alministración, pero nun tien carácter oficial, sólo'l castellán goza d'esta reconocencia. La llingua vasca sí tien carácter oficial na zona vacófona, compuesta por otros 61 conceyos de la zona norte de la comunidá, onde hai una mayoría de población vascofalante.
   La tramitación d'esta llei produxo ayeri la salida del Gobiernu de los dos conseyeros de Convergencia de Demócratas de Navarra (CDN) qu'integraben el Gobiernu navarru, en coalición col partíu gobernante Unión del Pueblo Navarro. CDN nun ta d'acuerdu con esta modificación.