Pardo anuncia que'l PP llevará l'escesu de coste d'El Musel a la Fiscalía si nun s'abre una Comisión d'Investigación

|

La presidenta del PP de Xixón y diputada nacional, Pilar Fernández Pardo, aseguró güei que'l so partíu encamentará a la Fiscalía qu'esclare los escesos de coste d'El Musel si nun s'abre una Comisión d'Investigación, preferiblemente na Xunta Xeneral del Principáu, anque nun descartó apoyar la iniciativa del diputáu d'IU, Gaspar Llamazares, de solicitala nel Congresu de los Diputaos. "Vamos llegar a onde tengamos que llegar", dixo.
   Pa ello, el PP presentará a la Fiscalía un 'dossier' con tola información qu'algamó. Nesti sen, señaló a los periodistes demientres la presentación d'una propuesta municipal na zona del Piles, que la so formación política tuvo apurando tolos trámites, denunciando que dalgo taba asocediendo con respeuto a les obres d'ampliación y alertando ante la posible perda de fondos europeos.
   De la mesma manera, criticó qu'IU-BA-Los Verdes -sociu del PSOE nel Gobiernu municipal y autonómicu- denuncie ante la UE los escesos de coste, pero que dempués nun apoye l'abertura d'una Comisión d'Investigación na Xunta Xeneral del Principáu y agora Llamazares la pida abrir nel Congresu. Por esti motivu, dixo nun esperar "sorpreses" del resultáu de mañana na mesa de la Xunta Xeneral, onde se valorará si abrir o non una investigación.
   Según Pardo, ye n'Asturies onde hai que baraxar la depuración de responsabilidaes, dao qu'El Musel ta nesta rexón, y si ye necesario, tamién a nivel nacional. La vocera del PP critico qu'a IU preocúpa-y más, según ella, "caltener los coches oficiales". Pa ella, ye más bien la "izquierda desunida", dao que los sos representantes nun comparten les mesmes posiciones nesti asuntu. "Nun pue caltenese que se diga lo mesmo y lo contrario", añadió.
   Tamién aseguró que nesti casu hai "munches irregularidaes", polo qu'existen responsabilidaes polítiques, alministratives, civiles y pue qu'hasta penales, dao qu'hai un organismu de la UE que ta baraxando eses "illegalidaes", Pardo llamentó que la responsabilidá la tengan los socialistes y los sos socios de gobiernu, pero qu'a lo cabero son los ciudadanos los que van pagar los escesos de coste.
   En cuanto al fechu de qu'a l'alcaldesa de Xixón, Paz Fernández Felgueroso, paéza-y indignante que'l presidente del PP, Mariano Rajoy, fale de llevar los escesos de coste d'El Musel, y encamiéntala a que nun entemeza les obres portuaries cola filaza 'Gürtel', Pardo retrucó-y a la rexidora que ye "una de les máximes responsables de les irregularides que tán asocediendo n'El Musel", dao que representa al Ayuntamientu nel Conseyu d'Alministración de l'Autoridá Portuaria de Xixón.
   Amás, echó-y en cara que nun dea cuentes ante'l Plenu de la Corporación y aseguró que ye una de les primeres persones que tendrá qu'asumir responsabilidaes polos escesos portuarios. "Que nun eche balones fuera", añadió l'alcaldesa.

Contador Estadistiques