"Vezos Astures" entama una xornada de música tradicional en Xixón

El Conceyu de Cultura Tradicional Vezos Astures, "dedicáu y enfotáu dende hai años a la recuperación y espardimientu de la cultura tradicional", entama esti sábadu 26 de setiembre una xornada cola música tradicional nel tendayu del Pueblu d’Asturies en Xixón.

Esta xornada entama a les 12:30 cola charla d’ún de los meyores conocedores del folclor salmantinu, Eusebio de Mayalde. Va siguise a les 17:00 con un taller pa neños nel que van construyise pequeños instrumentos tradicionales. Y dende les 19:00 va dexase l’escenariu pa que los músicos y aficionaos que-yos pete tengan un sitiu con megafonía pa amosar la so música. A les 21:00 el grupu salmantinu Mayalde, "va danos un conciertazu de música tradicional y sorprenderános con cantares de la vía de la plata bien asemeyaos a los asturianos", segun informa la organización.

Pa finar el tríu Merce, Varela y Caleya que van tocar al xeitu una bandina tradicional pa baillar hasta l’alborecer. "Vezos Astures" repite esti añu la ufierta qu’entamó l’añu pasáu cola I nueche en danza col "únicu enfotu de llevar la música tradicional baillable a tola xente que se quiera averar, sacándola de los corses y les coreografíes que dende hai tantos años va arequexando el baille tradicional n’ámbitos folcloristes".