UNA valora como intolerable l'actitú del PP de Mieres énte la llingua asturiana

|

Unidá Nacionalista Asturiana refugó l'actitú del Partíu Popular na Comisión de Cultura del Ayuntamientu, al abandonar un plenu del mesmu pola presentación de dos espedientes escritos dafechu en llingua asturiana. Pa la UNA  esta actitú "ye un reflexu del despreciu del PP pa cola llingua y la cultura del país, al tiempu que dexa a les clares la facilidá que tienen los grupos políticos n'Asturies pa saltar penriba de la llegalidá no tocante al asturianu".

Asimesmo l'agrupación d'UNA en Mieres conseña que "queda plasmada pol usu d'espresiones tales como 'presentado en un dialecto no oficial' que talamente paecieren surdíes d'una conversación de chigre más que de la boca de responsable políticos a los que se-yos sobreentiende una cultura xeneral suficiente como pa saber que la llingua asturiana nun ye nengún dialectu sinon un idioma reconocíu por organismos internacionales como la UNESCO. Asina, y al marxe de l'ausencia de criterios científicos o sociollingüísticos dalos que xustifiquen la so actitú, paga la pena recorda-y a la corporación municipal del Partíu Popular en Mieres que ta caminando nel filu de la illegalidá arreblagando perriba la Llei d'usu y promoción del bable asturianu qu'ellos mesmos aprobaron cuando taben nel Gobiernu".

D'esta forma l'agrupación de Mieres d'Unidá Nacionalista Asturiana pregúntase "cómo ye posible que se produzan fechos tan graves ensin que se pida responsibilidá política dala. D'esta miente desixímos-y al conceyal que ta acabante de ser espulsáu del PP Elías Álvarez que se retracte les sos palabres difamatories y al so exgrupu políticu qu'esprese públicamente'l so alcuerdu o desalcuerdu coles sos declaraciones. D'otru llau, pidímos-y a los cargos públicos del Conceyu de Mieres nel so conxuntu que reflexonen acerca de la inconveniencia de facer de menos un idioma que ye la llingua materna de la mayor parte de la ciudadanía del conceyu."

Comentarios

Nel PP de Mieres nun tienen sentíu del ridículo

Gabis

Cago'n mi macho!!! Too esto ye porque los nacionaliegos nun sabemos xuntamos. Y pasu ente pasu van dándonos turriazos hasta nel carné d'identidá. La culpa ye nuesa y namás que nuesa.

Por grande desgracia la característica fundamental del nacionalismu asturianu ye la so alta capacidá de disgregación y autodestrucción. Toos escriben guapos artículinos de xuntura y eses coses y a la hora la verdá más de lo mesmo, resultaos ridículos, espantibles y marxinales. Pero tan mui a gustu. Toi convencíu qu'esa xuntura total va ser mui difícil que se dea, yá se fizo delles veces, y siempre foi electoralmente un desastre. Xuntos y separaos los nacionaliegos-asturianiegos nun saquen nada, pero claro, tampoco ye plan de facer un partíu pa ún y dos amigos..."esti ye un partíu pa los nacionaliegos d'izquierdes soberanistes y ecoloxístes" ¿cuantes veces toos sentimos daqué apaecío?¿tan grande ye'l convencimientu hacia la ultraatomización del votu?

Gabis

Contador Estadistiques