El Conceyu Universitariu pol Asturianu felicita al Rectoráu pola "aprobación oficial d'estudios n'asturianu"

El Conceyu Universitariu pol Asturianu (CUPA) mostró la so felicitación al Rectoráu pola "aprobación oficial d'estudios n'asturianu", en referencia a l'aceptación, per parte del Conseyu de Gobiernu de la Institución, de los cuatro nuevos títulos de grau de la Facultá de Filoloxía, qu'inclúin el Minor de Llingua Asturiana, "títulu que pon a esti idioma la primer vegada nel sistema oficial d'enseñances".

   El CUPA quiso espresar "la so felicitación a la Universidá d'Uviéu pola aprobación definitiva de los estudios" y espera que "nel futuru los estudios d'asturianu sigan ampliando'l so espaciu, aspirando la organización a la creación futura d'un grau de llingua asturiana".

   Amás, recuerdó "que ye'l momentu de crear, dientro de la Facultá de Filoloxía, un Departamentu propiu pa la Filoloxía Asturiana, qu'anguaño ta representada namás con un grupu d'investigación, el Seminariu de Llingua Asturiana".

   L'aprobación d'esti plan ye, dende'l puntu de vista del CUPA, "un pasu hestóricu pal asturianu, qu'entra la primer vegada dientro de les enseñances reglaes y oficiales universitaries".