La Universidá aprueba los cuatro títulos de grau de filoloxía, qu'inclúin el Minor d'Asturianu

El Conseyu de Gobiernu de la Universidá d'Uviéu ta acabante d'aprobar los cuatro títulos de grau nos que se dividirán de magar agora los estudios de la Facultá de Filoloxía, dientro del Espaciu Européu d'Educación Superior, al que se tán adautando les enseñances universitaries. Nellos, inclúise'l Mínor d'Asturianu, títulu menor qu'integra la primer vez la llingua asturiana nos estudios de la Institución.

   En rueda prensa tres el Conseyu de Gobiernu d'esti xueves, el rector, Vicente Gotor, informó d'esti trámite. Diose autorización pa la tresformación de titulaciones al Espaciu Européu. Nesti ámbitu aprobáronse pa la Facultá de Filoloxía los graos d'Estudios Clásicos Románicos, Estudios Ingleses, Llingua Española y les sos Lliteratures y Llingües Modernes y les sos Lliteratures. Nesti últimu inclúise'l Minor de Llingua Asturiana, como un bloque d'ente seis y ocho asignatures que sumarán 48 creitos.

   D'esta manera, según indicó Gotor, n'ochobre tará completu'l mapa de titulaciones col que se pasará de les 76 actuales a los 56 graos.

   Tamién se trató la propuesta de graos n'Educación Social, Educación Infantil, Educación Primaria y Pedagoxía; y el grau en Turismu de la escuela privada d'Uviéu, incorporada a la Universidá.

ESCELENCIA INTERNACIONAL

   Amás, el rector destacó l'apoyu unánime que dio'l Conseyu de Gobiernu de la Institución al Proyectu del Campus d'Escelencia Internacional. "Agora la suerte ta echada", dixo, esperando que la selmana qu'entra Uviéu reciba'l sellu d'esclencia, anque recordó que va haber una segunda convocatoria n'abril.

   Na rueda prensa, Gotor señaló que "como siempre, hubo crítiques" al procedimientu siguíu pol equipu rectoral pa desarrollar el proyectu. Sicasí, destacó que nun s'ofrecieron alternatives y calcó nel pocu tiempu del que se dispunxo frente a los que-y pidieron un alderique más fonderu.

   De la mesma manera, argumentó que'l Campus d'Escelencia ye hasta'l 2012 y apuntó que'l reordenamientu de los campus ye "a llargu plazu". Pa Gotor, lo importante agora ye algamar el sellu d'escelencia pal proyectu apoyáu en dos 'cluster' d'investigación, el de Biomelecina y Salú, y el d'Enerxía, Mediu Ambiente y Cambiu Climáticu. Amás, destacó l'apoyu mostráu pol Gobiernu del Principáu d'Asturies a la iniciativa.