El conceyal del Ayuntamientu de Xixón de Cooperación y Cultura Tradicional, Jesús Montes Estrada, presentó en rueda prensa la programación de la Feria de San Miguel, que se celebrará los díes 26 y 27 nel Muséu del Pueblu d'Asturies, y que coincide colos actos d'Agropec (Feria del Campu y de les Industries Agrícoles, Ganaderes, Forestales y Pesqueres), nel recintu ferial del 25 al 27.

   Montes Estrada destacó l'éxitu de la primer edicion d'esta feria, el pasáu añu. Nesta ocasión, l'Ayuntamientu cuenta cola collaboración de Nicer Mercados Temáticos, qu'entamará un mercáu tradicional asturianu, con pasucais de gaita y tampor, escenes costumistes y talleres de fabricación artesana.

   De la mesma manera, cuéntase col apoyu de l'Asociación Cultural Vezos y Costumes, qu'ufiertará una combinación d'animación musical y actividaes culturales, asina como una amplia muestra de productos de la güerta y la ganadería del país. Tamién participa la Cooperativa d'Agricultores de Xixón.

   Dientro de les actividaes, celebraráse un conciertu de musica tradicional a cargu d'Eusebio Mayalde (Salamanca), el día 26 a les 21.00 hores. Tamién va haber chigre, puestos d'artesanía y hasta un escenariu llibre pa que participe tol que quiera faciendo música.

   Montes Estrada apuntó que l'accesu va ser de baldre y que se facilitarán entraes al que queira pasar dende'l Pueblu d'Asturies al recintu ferial, onde se celebra Agropec. "Tol mundu va tener una entrada", afirmó.