La presidenta del PP de Xixón y diputada Pilar Fernández Pardo, presentó nel Congresu de los Diputaos una entruga dirixida al Ministeriu de Fomentu na qu'entruga polo que va pagar la compañía Enagás polos terrenos de la regasificadora n'El Musel (Xixón). "¿Qué cantidaes ha abonar la compañía Enagás, y por qué conceptos, a l'Autoridá Portuaria de Xixón pola instalación nos terrenos del puertu d'El Musel d'una planta regasificadora?". Ye'l conteníu lliteral de la pregunta, según informó'l PP.

   El motivu de presentar la iniciativa, según Fernández Pardo, ye la "negativa" per parte de los responsables del proyectu a informar sobre los importaes económicos que van suponer pal puertu la planta regasificadora y la futura planta de ciclu combináu. Recordó que los responsables socialistes aseguren que'l préstamu, de 215 millones, que Puertos del Estáu concederá a l'autoridá portuaria pa facer frente al escesu de coste de l'ampliación, va devolvese polos ingresos que'l Puertu va recibir pola propia instalación de la regasificadora d'Enagás, y pola futura planta de ciclu combináu.

   "Espero que la respuesta que dea'l Gobiernu a esta cuestión permita conocer l'algame económicu qu'esta infraestructura supondrá pa los ingresos de l'Autoridá Portuaria de Xixón y, poro, si son determinantes pa financiar esi préstamu", dixo Fernández Paro.

   La dirixente xixonesa señaló que tovía sigue siendo una entruga "fundamental" nel aire: "¿Cómo va pagar el puertu d'El Musel el préstamu comprometíu pol ministru José Blanco?".

   Un día dempués del actu d'entrega a Enagás de los terrenos onde va asitiase la planta regasificadora, el PP de Xixón sí espresó la so satisfaición por una actuación que va trayer consigo una inversión inicial de 377 millones d'euros, ampliables nel futuru, y la xeneración de 1.700 emplegos hasta l'añu 2012.

   Sin embargu, Fernández Pardo llamentó les manifestaciones realizaes per parte de dirixentes del PSOE demientres esi actu, al que, según dixo, nun se convidó a los responsables del PP nin como miembros de la Corporación xixonesa nin como representantes nel Congresu y Senáu.

   Calificaron de "falses" les declaraciones realizaes polos responsables del proyectu sobre l'escesu de coste qu'acumula El Musel. "Cuando'l presidente del Principu, Vicente Álvarez Areces, fizo referencia, una vez más, al cainismu qu'existe na vida política asturiana, tenemos que recorda-y que los fíos de Caín comparten con él la mesa del Conseyu de Gobiernu toles selmanes y son los que lu caltienen como presidente d'esta rexón a cambiu de les prebendes que-yos otorga", esplicó, en referencia a Izquierda Unida, que, según Fernández Pardo, son los que, per una parte, "denunciaron la obra d'El Musel na Unión Europea y, per otra, niéguense a abrir una investigación na Xunta Xeneral del Principáu".

   A xuiciu del PP, el presidente del Principáu, Vicente Álvarez Areces, l'alcaldesa de Xixón, Paz Fernández Felgueroso y el presidente de l'Autoridá Portuaria de Xixón, Fernando Menéndez Rexach, son los principales responsables de que la Unión Europea denegare a España los fondos necesarios p'acabar la obra.

   "Queda pendiente determinar la so actuación na contratación inicial, nel desarrollu de les obres d'amplaición y los trámites realizaos cuando se fizo patente la gran esviación presupuestaria y por supuesto, tamién ta pendiente fixar les sos responsabilidaes polítiques y de tou orde nesti asuntu", apuntó.