El proyectu de la regasificadora va p'alantre col sofitu del Gobiernu asturianu

|

La instalación d'una regasificadora nos terrenos d'El Musel en Xixón va p'alantre col sofitu del Gobiernu asturianu. El Presidente Vicente Álvarez Areces asistió ayer a la entrega de los terrenos nel puertu xixonés a favor d'Enagás. Pal gobiernu ye "una infraestructura clave pal desarrollu de la Estratexa Enerxética d'Asturies y un pegoyu fundamental de la Planificación Enerxética Nacional". Sicasí, la plataforma ciudadana "Regasificadora Non" refuga'l proyectu por nun contar con "nenguna información nin debate públicu sobre so seguridá y conveniencia estratéxica dende'l puntu de vista enerxéticu".

Según el Gobiernu asturianu "esti pasu supón l'entamu d'un proyectu de gran importancia p'Asturies, que tuvo que superar un llargu procesu de tramitación hasta algamar la declaración d'impactu ambiental y l'autorización alministrativa necesaries pal so desarrollu. Esta actuación súmase a la llista de proyectos enerxéticos qu'Asturies desendolcará nos próximos años y que supondrán inversiones superiores a los 3.500 millones d'euros."

L'executivu asturianu afita que van invertise na obra 377 millones de euros, a los que van amestase otros 120 millones pa la rede de tresporte de gas. Asimesmo conseñen que "permitirá crear 800 puestos de trabayu directos y 900 indirectos na fase de construcción, y alredor
de 120 na fase de operación y mantenimientu."

La planta d'Enagás va suministrar gas pa les plantes de xeneración eléctrica en base a ciclos combinaos de gas, de les qu'hai proyectaes 7 nel nuesu país.

LA PLATAFORMA "REGASIFICADORA NON" REFUGA'L PROYECTU

Pela so parte la plataforma ciudadana "Regasificadora Non" refuga'l proyectu por nun contar con "nenguna información nin debate públicu sobre so seguridá y conveniencia estratéxica dende'l puntu de vista enerxéticu". Asimesmo dicen nun entender cómo se proyecta una nueva regasificadora "coles regasificadores españoles a un 50% de so capacidá, les ampliaciones de la de Barcelona, Sagunto y probablemente Bilbao y la futura entrada en serviciu del nuevu gasoductu directu dende Arxelia per Almería". Según la plataforma nun s'atendieron "a criterios económicos nin estratéxicos que veníen siguiendo otres infraestructures enerxétiques".

Comentarios

¿LOS VERDES son parte del actual gobiernu asturianu?

Gabis

Contador Estadistiques