El Sporting algama un valiosu empate en Valencia

|

Cada xornada que pasa fai qu'aumenten les bones sensaciones que dexa l'equipu asturianu. Anque ye bien ceo pa facer pronósticos, l'empate algamáu en Valencia teniendo amás que xugar con un futbolista menos durante más d'una hora pola espulsión de Michel fai qu'en principiu l'afición roxiblanca pueda ser optimista respective a la continuidá del so equipu na máxima categoría.

Los asturianos empataron con diez ante ún de los "gallos" de la Primera Divisón. El partíu nun pudo emprincipiar meyor pa los visitantes, porque yá nel minutu 6 diben adelantase nel marcador tres una internada de Barral pela banda derecha qu'acabó marcando axustando el balón al primer palu depués de recibir un llargu y precisu pase de Rivera. Sicasí, les coses diben torcese en malpenes dos minutos, tres pasar el Valencia a la ofensiva. L'acosu local diba tener la so recompensa cuando Juan Pablo nun pudo blocar un disparu de Silva, cayendo'l rechace nos pies de Villa que nun diba fallar la ocasión. Darréu del gol, por cuenta d'una mano mui infantil de Michel el Sporting diba quedar con diez a los 26 minutos, teniendo que xugar n'inferioridá durante más d'una hora. A partir d'esi momentu l'asediu valencianu intensificóse. L'acosu local y el repliegue visitante impuesto poles circunstancies facía temer que'l segundu gol valencianu llegase bien llueu. De toes formes esti nun se fadría hasta'l minutu 60 cuando villa recibió d'espaldes a la portería na frontal del área, y dándo la vuelta enganchó un magníficu disparu que pasó pela escuadra ensin que Juan Pablo pudiere facer nada pa evitalo. Un gol que, por cierto, l'ex-sportinguista nun celebró, como fixere tamién col primeru.

Con diez y yá perdiendo l'entrenader sportinguista Manolo Preciado, como ye habitual nos sos planteamientos, decidió echar el restu y metió nel campu a Bilic y Luis Morán, aumentando la capacidá ofensiva del equipu. El Valencia pela so parte durmióse, perdió'l control del mediu'l campu y acabó domináu polos asturianos, que tendríen la so recompensa nel minutu 86 tres un centru en saque de falta de Rivera nel que la defensa del Valencia y el porteru obstaculicense mutuamente, circunstancia que foi aprevechada por Gregory, que remató de cabeza nel área pequeña introduciendo'l balón na rede. Primer gol de cabeza d'ún de los fichaxes de la temporada que ta dando un mui bon resultáu, como'l restu de los nuevos. Col 2 a 2 llegaríase al final del partíu.

Seriedá, trabayu, esfuerzu y concentración fueron les claves d'esti mui ellaboráu empate qu'asitia al Sporting con 4 puntos y décimu na clasificación, a la espera de la visita del Zaragoza esti próximu xueves. Hai que conseñar amás, como na xornada anterior, que los fichaxes cumplieron con nota. El porteru Juan Pablo paró tolo parable, Gregory amosó otra vuelta la so contundencia defensiva y la so peligrosidá nel xuegu áreu ofensivu y Rivera aportó coherencia y visión de xuegu nel centru del campu. Paez qu'hai equipu.    

Ficha Técnica

Valencia 2 - Sporting de Xixón 2

Valencia: Moyà, Bruno, David Navarro, Alexis, Mathieu (Albelda, m.68), Marchena, Banega (Michel, m.73), Pablo (Joaquín, m.58), Silva, Mata y Villa.

Sporting: Juan Pablo, Lora, Gerard, Gregory, Canella, Rivera, Michel, Maldonado (Bilic, m.61), De las Cuevas (Diego Camacho, m.34), Diego Castro (Luis Morán, 71) y Barral.

Goles: 0-1, m.6: Barral. 1-1,m.24: Villa. 2-1, m.60: Villa. 2-2, m.86: Gregory.

Árbitru: Fernández Borbalán (andaluz). Sacó tarxetes amarielles a los sportinguistes Gerard y Lora, y a los valencianistes Marchena, Albelda, Alexis y Bruno. Espulsó a Michel por doble amariella (m.26).
 

Contador Estadistiques