L'Arribada tien esti sábadu la so inauguración oficial cola llegada de los escritores

Esti sábadu ye la inauguración oficial de l'Arribada 2009, anque delles actividaes yá se vinieron desendolcando a lo llargo d'esta selmana. Concretamente a les 17 hores nel Puertu Deportivu de Xixón (El Muelle) va ser l'arribada de los escritores participantes nesta "vagamar lliteraria". Asimesmo va facese un homenaxe a la escritora valdesana Nené Losada Rico, finada esti añu.

La inauguración va ser a les 17:30 hores nel Salón d’actos Centru Cultura Antiguu Institutu cola intervención d'autoridaes autonómiques y locales y del coordinador de l'Arribada 2009 Humberto Gonzali. A les 18:00 hores va proyectase'l documental "L’últimu chalgueiru", que quier amosar la llabor de los chalgueiros o ayalgueros n'Asturies, al traviés del testimoniu d'Emilio Cuervo, de Sotu’l Barcu, que dedicó parte de la so vida a esa llabor.
 
A les 19:15 va ser l'Homenaxe a Nené Losada Rico, actu coordináu por Aurora García Rivas, que va constar de dos semblances de la homenaxeada, que fadrán la propia Aurora García Rivas y Antón García y d'una llectura colectiva de poemes cola intervención de políticos, representantes del asociacionismu xixonés y escritores y col acompañamientu musical con harpa a cargu de Daniel García de la Cuesta. Finalmente a les 20:30 van presentase los Premios “Nené Losada” publicaos na Editorial Universos.

Los llectores d'Asturies.com pueden consultar nesti enllaz la programación completa de l'Arribada 2009.