El Gobiernu asturianu aprueba los decretos de proteición de los entornos de les cinco cueves inscrites na Unesco

|

El Conseyu de Gobiernu del Principáu aprobó los decretos de proteición del entornu de nueve cueves asturianes con arte rupestre paleolíticu, ente les que figuren les de Tito Bustillo (Ribesella) y Llonín (Peñamellera Alta), incluyíes dende'l pasáu añu nel llistáu de Patrimoniu Mundial de la Unesco.

   Les otres siete cueves que cuenten con una nueva figura de proteición patrimonial son La Cuevona, Les Pedroses, La Lloseta y San Antonio, nel conceyu de Ribesella; El Quintanal y Valmori, nel conceyu de Llanes; y la cueva de mazaculos II, nel conceyu de Ribedeva.

   El conxuntu d'entornos de proteición agora aprobaos pa cueves que cuenten con artes paleolíticu rupestre tien en común el fechu d'afectar, na so mayor parte, a cavidaes llocalizaes en relieves cársticos, colo qu'ello supón de necesidá de controlar l'área a la redonda, a les mesmes que tien afeición directa sobre les sos condiciones medioambientales, fundamentalmente al través de les infiltraciones d'agua.

   Los entornos de proteición adáutense a les condiciones hidrográfiques, d'infiltración y topográfiques del ámbitu nel que s'asitien les cavidaes, col fin de controlar les actuaciones que se puean producir y que tengan afeición directa sobre la cavidá. Esta llende d'entornos vien a concretar el compromisu tomáu pol presidente del Principáu, Vicente Álvarez Areces, nel so discursu de nomamientu, nel 2007, de protexer el conxuntu de 48 cueves, con arte rupestre paleolíticu existentes n'Asturies.

   Nuna sesión celebrada'l pasáu 1 de xunetu, el Conseyu de Gobiernu aprobó la llende d'otres diez cueves, ente les taben dos (La Peña de Candamu y El Pindal), inscrites na Llista de Patrimoniu Mundial de la Unesco.

Contador Estadistiques