La Coordinadora Ecoloxista presentó alegaciones contra l'ampliación de "Fuentes de Invierno"

17 Setiembre, 2009 por Pablo R. Alonso

Inicie sesión o rexístrese pa espublizar comentarios

La Coordinadora Ecoloxista d’Asturies ta acabante de presentar alegaciones énte l'alministración asturiana pa que na prevista ampliación de la Estación Invernal de "Fuentes de Invierno" n'Ayer se faiga enantes un "estudiu d'impactu ambiental seriu". Según los ecoloxistes lo que "s'aprobó en xunu de 2004, taba venceyao a que les obras se fixeren enantes de 5 años. Al pasar estos 5 años ye preciso una nueva tramitación pa cualesquier ampliación, como les previstes agora".

Según la CEA "hai que reiterar que la Estación nun tien viabilidá económica nin mediu ambiental nes 2 temporaes que lleva activa y paez innecesaria dafechu l'ampliación de la zona a edificar". Afiten que nun se tien en cuenta "la realidá de la zona coles sos limitaciones tanto espaciales como d'asimilación de residuos poles persones que repercuten na zona. Ensin da-y un tratamientu correctu a la basura xenerada que se puede ver tirada durante y depués de la temporada d'esquí".

Por too ello "solicitar más ampliaciones de cualesquier triba nun paez axustase al procedimientu que propunxeren nes sos propies normes daes pa les distintes fases de les obres."

Comentarios

tomate wrote on 17 Setiembre, 2009:

Si quieren ampliar "Fuentes de Invierno" nel Puertu Braña pues fadránlo. Con un EIA (Estudiu d'Impautu Ambiental) la obra, como muncho, podrá retrasase daqué pero namás.
Los EIA son una tomadura de pelo. El Gobiernu X pide a la empresa Y que se dedica a mediu ambiente que-yos elebore un EIA. La empresa Y, con tola gayola del mundu, yá que vive d'ello, entama l'estudiu. Davezu, depués de dellos meses (años debería ser lo correuto -o polo menos un ciclu biolóxicu de les especies que proliferen más lentamente-) lleguen a la conclusión, que ye doble y con consecuencies contraries.
- Si declaren nel EIA que la obra ye un erru, que l'impautu ye agresivu pa col mediu ambiente, al pagador (el gobiernu X) nun va gusta-y nada. Asina, pal próximu estudiu que s'escaezan de que-yos lu pidan, colo que se-yos acabaron les perres y a pesllar la empresa. Pal paro.
- Si declaren nel EIA que la obra tien un impautu leve, pues el pagador, gayasperu, entama la obra corrixendo los defeutos que s'encamienten, pero la obra faise. La empresa Y cobra toa arguyosa d'haber fecho l'EIA pal Gobiernu Y, amplía'l so curriculum y aguarda arranada a proyeutos nuevos como un mercenariu fiel.
Y namás. Ye lo que tien. Que les empreses que viven d'ello nun tienen la independencia económica pa poder dicir NON a esti tipu d'obres y como ye d'ónde xinten pues, como diz el refrán: nun muerdas la mano que te da de comer. Y eso ye lo que faen. Y eso ye lo que pasa con toes estes grandes obres que siempre acaben construyéndose. Y la rodiada pues cada vez peor.