Trebolgu nun prevé organizar más Alcuentros y espera que l'Ayuntamientu d'Uviéu "tome'l relevu"

L'asociación cultural Trebolgu d'Uviéu nun tien pensao organizar nueves ediciones de los Alcuentros Tradicionales, qu'el pasáu llunes celebraron la so décima edición, incluyíos la primer vez nel programa de conciertos de la Plaza de la Catedral de San Mateo. La esperanza del colectivu ye que seya l'Ayuntamientu'l que siga organizándolos, oxetivu col qu'ofrecen la so total collaboración.

   Asina s'espresó'l  presidente de Trebolgu, Guillermo Pérez, organizador d'eventos y gaiteru del grupu Los Gatos del Fornu, quien mostró la so satisfaición polos diez años de trabayu desarrolláu en favor de la cultura y la música asturiana, y especialmente pol resultáu de los últimos Alcuentros, celebraos el pasáu llunes.

   Pérez recordó que'l festival de Trebolgu nació col oxetivu de recuperar los conciertos de música tradicional qu'hubo n'Uviéu hasta últimos de los años 80 y primeros de los 90. "Llevábamos diez años sin actuaciones de música tradicional y queríamos que polo menos hubiere otros diez con festivales". "Decidimos facer el primer conciertu poniendo'l llistón mui altu, con Los Gatos del Fornu, N'Arba, Tejedor y Dixebra. Foi un auténticu trunfu", señaló, en referencia a l'asistencia de públicu y recaudación, anque reconoció que "pagaron la inesperiencia", porque acumularon un déficit económicu que tardaron en saldar.

   Pol escenariu de los Alcuentros pasaron, según reseñó, los principales grupos de música asturiana: La Curuxa, Herbamorsa, Tuenda, La Bandina'l Tombu, Corquiéu, Llande Cubel, Skama La Rede, Dixebra, amás d'artistes de fuera d'Asturies, como'l gaiteru escocés Fred Morrison, y d'actuaciones de grupos de baile, pasucais y hasta mercaos tradicionales.

   Dempués de diez años, Pérez considera que l'oxetivu ta cumplíu. Amás de la década de conciertos de Trebolgu, recuerda que nesti momentu n'Uviéu hai un festival de música tradicional na fiesta de L'Ascensión, una nueche celta de San Mateo qu'espera que se caltenga en próximes ediciones, y un concursu de baile y música tradicional nel Teatru Campoamor demientres tol añu.

   Tando "l'oxetivu cumplíu", Pérez confirmó que Trebolgu nun cuenta facer más Alcuentros Tradicionales como organizador, si bien nun pieslla dafechu la puerta a la posibilidá d'entamar una undécima edición. Recordó nesti sen que cuando'l festival entamó los organizadores teníen 20 años y munches ilusiones. "Agora yá nun tenemos el mesmu tiempu, nin les mesmes fuerces, nin la mesma xente", pues recordó qu'hasta hai componentes de l'asociación que tán viviendo fuera d'Asturies.

   Por esti motivu, Pérez formuló'l deséu del colectivu de que seya l'Ayuntamientu'l que tome'l relevu. Calcó na bona rellación col Conceyu nos diez años de festival, del que "foi'l principal promotor", con una importante sovención añal que llegó a los 10.000 euros. Con esti enfotu, ofreció la collaboración y les ganes de trabayar de la masa social de Trebolgu, pero non el llabor organizativu nin la financiación, esti últimu l'aspeutu más problemáticu de les xornaes.

   Ante la posibilidá de que l'ausencia de los Alcuentros se cubra con una nueche celta nes fiestes de San Mateo, Pérez opinó que "xunu y el Parque del Oeste" son "l'enclave y la fecha ideal". Señaló que ye un llugar afayaízu pa un conciertu tradicional, pola posibilidá de facer "una fiesta de prau" dientro del cascu urbanu de la ciudá y por los miles de persones qu'acudieron toles ediciones. "Hubo años que llegamos a zarrar la barra a les siete la mañana", comentó.

   Pérez acabó agradeciendo la collaboración, amás d'al Ayuntamientu d'Uviéu, a los collaboradores, talos como Caxa Rural, a los diferentes comercios y los medios de comunicación que publicitaron les diferentes ediciones de la cita de música tradicional. "Portáronse toos bien", comentó.

RESULTÁU DE LA ÚLTIMA EDICIÓN

   Espresó tamién la so satisfaición pol resultáu de la última edición, qu'algamó enllenar la plaza de la catedral "un llunes en viéspera de día llaborable", matizó. Actuaron la Banda Gaites Ciudá d'Uviéu, La Curuxa y Dixebra.

   Los alcuentros celebráronse dientro de la programación de San Mateo, tres suspendese'l festival de xunu nel Parque del Oeste, al coincidir con un congresu mélicu. En compensación, el Conceyu, por pidimientu de l'asociación, aceptó facelo na Plaza de La Catedral peles fiestes.

   El presidente de Trebolgu señaló, amás del numberosu públicu, la participación de los asistentes, que ficieron dances y bailaron al ritmu de los temes qu'interpretaron. Añadió amás que nel casu de Dixebra, foi la primer vez qu'esti grupu tocaba nes fiestes patronales uvieínes.

   Pa Pérez, demostróse que "la música asturiana ye rentable", porque "llenóse la Plaza de la Catedral con grupos que tienen un caché baratu y que nun cobren viaxes, nin agospios". "Col caché de cualquier de los otros artistes qu'actuaron en San Mateo facemos trés Alcuentros de Trebolgu", añadió.

   Por esti motivu, consideró que l'Ayuntamientu d'Uviéu tuvo qu'apostar por caltener una actuación de música tradicional dientro de les fiestes de cara al futuru. 

ACTIVIDAES HASTA FINAL D'AÑU

   Trebolgu tien previsto organizar polo menos otres trés actividaes no que queda d'añu. Una d'elles será un amagüestu. Dempués una espicha, coincidiendo cola matanza del gochu. Y a lo último, una nueche folk de fin d'añu, en Nuechevieya.

   Les feches y programes d'estes trés cites dirán conociéndose nos próximos meses, según el presidente de l'asociación.