El PP acusa a Areces de vivir nuna "arcadia feliz" y recuérda-y que'l paru creció n'Asturies nel últimu añu un 40%

El presidente del PP n'Asturies, Ovidio Sánchez, acusó al presidente del Principáu, Vicente Álvarez Areces, de vivir nuna "arcadia feliz" y recordó-y que'l paru subió n'Asturies nel últimu añu un 40 por cientu. "Va haber miles de persones que crean qu'Areces, colos sos comentarios sobre la bona marcha d'Asturies, ta tomándo-yos el pelu". Sánchez realizó estes manifestaciones demientres la rueda prensa qu'ofreció na Xunta Xeneral del Principáu col oxetu d'analizar dellos asuntos de l'actualidá del país.

   El cabezaleru del PP asturianu recordó a Areces que la recaudación del IVA n'Asturies descendió un 40 por cientu, lo que significa que descendió'l consumu. Nesti sen, tamién destacó la baxada del IRPF, "síntoma de que los asturianos cada día son más probes", señaló y añadió que tamién baxó l'impuestu de sociedaes, polo que "les empreses tienen menos beneficios y vense obligaes a prescindir de trabayadores".

   Sánchez reprochó al presidente del Principáu que dixere la selmana pasada en Mieres que les cuenques mineres viven nun momentu "óptimu". Nesti sen, el cabezaleru de los 'populares' asturianos destacó que les cuenques mineres rexistren 10 puntos de paru penriba de la media nacional y señaló que'l 50 por cientu de los mozos menores de 30 años tán nel paru. "Esta falta de trabayu torna en descensu de población", añadió.

   Nesti sen, Sánchez recordó que'l Gobiernu tien paralizaos 1.000 millones d'euros na comarca minera "por falta de xestión y d'idees". "L'executivu del Principáu nun foi a tresformar esi dineru n'emplegu y riqueza", apuntó.

   Sánchez tamién acusó al Gobiernu central nel apartáu de les inversiones p'Asturies. "Zapatero dixo nel so momentu que l'AVE llegaría al Principáu nel añu 2009 y ta acabando", señaló, y añadió que "naide se cree que mos digan que vamos tener Alta Velocidá nel 2012".

   "Tampoco se sabe nada del tramu de Salas-La Espina o l'Autovía a Ponferrada", apuntó Sánchez, y añadió que "el Gobiernu socialista escuda los retrasos nos modificaos, mientres que cuando gobernaba'l PP los modificaos diben cola obra", añadió.

   A lo último, Sánchez destacó tamién el "aislamientu" del Principáu, pola perda de conexones aérees dende l'Aeropuetu d'Asturies. "En Cantabria, con un aeropuertu más pequeñu tán comiéndomos la tostada ofreciendo más destinos y a precios más baratos". "Necesítense menos declaraciones y más trabayu y más compromisu con Asturies".