Los ecoloxistes denuncien ante'l Principáu un nuevu vertíu na ría d'Avilés

El Colectivu Ecoloxista denunció al Principáu un nuevu vertíu d'una sustancia oleaxinosa na ría d'Avilés, asegurando que se pudo apreciar na marea baxa pero que se produxo cuando la marea taba alta, a les 17.00 hores --al atopase pexes muertos enriba de les piedres--. Según los ecoloxistes apaecieron decenes de pexes muertos nel tramu del paséu de la ría nes dos marxes, dende la salida del colector de bateríes hasta'l Puente Azud.

   Al traviés d'un comunicáu, los ecoloxistes afirmaron que los pexes muertos apreciábense na parte derecha y izquierda per parte de los numberosos pasiantes que pellí circulen. "A la oriella del Centru Cultural Internacional Oscar Niemeyer, l'espectáculu yera llamentable, manches de sustancies flotando con pexes muertos na oriella, tou un exemplu de modernidá y respetu medioambiental de la ciudá", destacaron.

   Poro, mostraron la esperanza de que'l Principáu tome muestres esta vez y que nun pase como l'anterior del pasáu 16 d'agostu, que se tomaron muestres y "nun quixeron poro demostrar l'autoría".

   "Esperamos qu'esta vez les alministraciones seyan rápides n'exixir responsabilidaes, y se comprometan a buscar una solución que nun paez tan difícil pa les emprses que quieren siguir funcionando pero que tienen que facelo invirtiendo dineru pa evitar los graves episodios contaminantes que tamos sufriendo dende hai años y qu'estos díes volvieron repetise con demasiada frecuencia", acabaron los ecoloxistes.