Celébrense esti llunes los Alcuentros de Trebolgu

Una de les cites más importantes cola música del país, los Alcuentros de Trebolgu, celébrase esti llunes 14 de setiembre, en plenes fiestes de San Matéu d'Uviéu. La cita va ser a les 21:30 hores na plaza de la Catedral de la capital asturiana y va contar cola actuación de la banda de gaites "Ciudad de Oviedo", la bandina de música tradicional "La Curuxa" y el perconocíu grupu de rock "Dixebra".

Entamaos pola Asociación Folclórica y Cultural Trebolgu, esta décima edición taba prevista celebrase nel mes de xunu, nel entamu del branu, como yera tradicional. Sicasí, a última hora y por causes ayenes a la organización hubo de suspendese. A la fin, los organizadores y el Conceyu d'Uviéu apautaron incluyir esta décima edición de los Alcuentros de Trebolgu na programación festiva mateína.

DÍA DE LA MÚSICA ASTURIANA

Sicasí, esta nun va ser la única cita nes fiestes uvieínes cola música del nuesu país. El domingu 20 de setiembre, tamién na plaza de la Catedral, dientro del "Día de la música asturiana" va haber actuaciones de tonada, cuartetos, ochotes, gaiteros y cantautores, y va zarrase la xornada con un conciertu de los grupos folk "Spanta la xente" y "Delagua", y col conciertu del perconocíu músicu José Angel Hevia.