El Sporting algamó'l so primer trunfu

|

El Sporting de Xixón algamó na segunda xornada de Lliga'l primer trunfu ante un Almería feble. Los sportinguistes desendolcaron un xuegu que dexó un tastu mui positivu de cara al futuru del equipu asturianu na máxima categoría. Contundencia en defensa y efectividá n'ataque fueron l'amiestu necesariu pa sumar los trés primeros puntos nun partíu nel que los fichaxes roxiblancos aprobaron con nota.

Yera vox populi que la Lliga realmente entamaba pal Sporting nesta segunda xornada tres pasar el trámite del Nou Camp, y nesta ocasión los asturianos supieron resolver bien ceo'l so primer partíu importante. Un equipu bien asitiáu y coles idees clares fue quien a adelantese nel marcador yá nel minutu 5, depués de que Lora centrase al área un balón que Diego Castro remató nun segundu intentu tres el primer de De las Cuevas, que zapicó al tratar d'enganchalu. A partir d'esi momentu nun diba movese'l marcador, a pesar de que los locales tuvieren delles oportunidaes más na primer parte y na que los andaluces malpenes llegaren con peligru a la meta asturiana. ún d'eses ocasiones foi la de Diego Castro tres un pase de Rivera, na que'l xugador sportinguista remató'l balón nel aire dando-y más fuerza de la necesaria nuna ocasión clara de gol.

Na segunda parte l'Almería quixo espabilar y llanzase al ataque, con más ganes qu'efectividá. Sicasí, el Sporting enxamás-y perdió la cara al partíu y supo cortar les escases llegaes al área de los andaluces. Mientres, los locales buscaben sentenciar al contrataque, sicasí faltó l'últimu remate que-y diere'l segundu gol a los asturianos. A la fin llegóse'l final del partíu ensin que los visitantes supieren desplegar un xuegu ofensivu medianamente efectivu.

D'esti partíu, amás del resultáu, ye a destacar l'actuación de los fichaxes. El porteru Juan Pablo foi seguru y efectivu; los centrales Gregory y Botía amosaron una contundencia y un bon facer que permitió dexar la portería a cero. Rivera nel centru'l campu movióse con soltura y criteriu, mientres que De las Cuevas apuntó maneres d'un mediupunta vertical y con disparu. A too ello amestóse la incorporación de Lora nel lateral derechu, que defensivamente cumplió y na estaya ofensiva amosó un poder desequilibrante que-y permitió al Sporting algamar los trés primeros puntos nesti campenonatu.

Ficha técnica

Sporting de Xixón 1-Almería 0

Sporting de Xixón: Juan Pablo, Lora, Botía, Gregory, Canella, Michel, Rivera, Maldonado (Luis Morán m 65), De las Cuevas, Diego Castro (Diego Camacho m 81) y Barral (Bilic m 71).

Almería: Alves, Michel, Chico, Santi, Cisma (Guilherme m 75), Juanma Ortíz (Nieto m 62), Bernardello, Soriano, Crusat, Uche y Corona (Piatti m 45).

Goles: 1-0 Diego Castro (m 5).

Árbitru: Delgado Ferreiro (vascu). Sacó tarxetes amarielles a Maldonado (m 7), Soriano (m 33), Cisma (m 63), Crusat (m 86), (Nieto m 89) y Gregory (m 90).

Comentarios

Tendremos una temporada más tranquilina que la del añu pasáu? Ye pronto pa dicilo, pero les sensaciones son bastante meyores qu'hai un añu. Veremos contra Valencia y Zaragoza si se confirma'l bon xuegu.
 

Efectivamente ye pronto pa empixase, pero tamién yera pronto pa criticar y estos últimos díes llovieron palos totalmente inxustos de parte d'ún sector de la prensa bien arrimáu al poder que nun escuende yá les sos cartes y que nun va perdona-y nada a Preciado.
Güei esos "fenómenos" callen como afogaos viendo como eso que dicíen yera una"ocurrencia", poner a Lora de lateral, dio un resultáu pistonudu. Y a los que poníen a caldo a De las Cuevas y Rivera, ídem.

Contador Estadistiques