La Xunta de Personal Docente non Universitariu alvierte de "recortes y desbarafuste" n'Educación

La Xunta de Personal Docente non Universitariu alvirtió güei de "recortes y desbarafuste" na Conseyería d'Educación ante l'entamu del cursu escolar. Según informó'l colectivu nuna nota prensa, produxéronse "abondos errores" na axudicación del profesoráu n'especativa, en práctiques y interinos, pola desapaición de les places al llegar el profesoráu a tomar posesión.

   Quéxense de la mesma manera de la supresión de puestos de los equipos d'orientación, cola consiguiente reducción na atención al alumnáu con mayores necesidaes. Tán zarrándose tamién unidaes, rebaxando la posibilidá de desoblar grupos n'abondos centros educativos. Según la Xunta, "existen munchos casos de grupos con 27 alumnos por aula en primaria y infantil".

   De la mesma manera, llamentaron que'l Conseyeru dibuxare un panorama "escursu" pa la educación asturiana, plantegando que "tanto los gastos de funcionamientu de los centros, como les sustituciones de profesoráu esti cursu peligren por mor de la reducción presupuestaria y del previsible aumentu del númberu de baxes".

   Los representantes sindicales manifestaron tamién refugu ante esti recorte que "va afectar a los programes educativos que se desarrollen dende la Conseyería d'Educación", y exixeron que la educación asturiana reciba los fondos necesarios pa garantizar "la correcta atención educativa, les correspondientes sustituciones del profesoráu y que s'acabe'l desbarafuste nes axudicaciones d'entamu de cursu que perxudiquen tanto al profesoráu afectáu como a los centros educativos".

   La Xunta de Personal encamentó a la Conseyería que reduza los gastos "superfluos" na alministración y a nun aforrar nes necesidaes d'un sistema que yá vio amenorgáu enforma'l númeru de profesores pal cursu próximu.

   Nesti sen, la Xunta de Personal va aconceyase'l próximu llunes col grupu parlamentariu popular de la Xunta Xeneral del Principáu a les 12 de la mañana