Los precios suben un 0,4% n'agostu n'Asturies y la tasa interañal asítiase nel -1,1%

|

L'Índiz de Precios de Consumu (IPC) subió nel nuesu país demientres el pasáu mes d'agostu un 0,4 por cientu, penriba de la media estatal asitiada nel 0,3%, según datos espardíos güei pol Institutu Nacional d'Estadística (INE). No que va d'añu, los precios baxaron na comunidá un 0,6 por cientu, cuatro décimes más que la media estatal (-0,2 por cientu); mientres que la inflación asturiana algamó'l -1,1 por cientu; Castiella y Lleón y Aragón (-1,3%) y Navarra (-1,2%).

   Con una tasa del -1% asitiáronse Estremadura y Murcia; Andalucía rexistró un -0,9%; Cantabria un -0,8%; Baleares y Comunidá Valenciana (-0,7%); Madrid (-0,5%), Melilla (-0,4%), CAtaluña (-0,3%), Ceuta (-0,2%) y País Vascu (-0,1%).

   N'Asturies, la subida de los precios n'agostu debióse fundamentalmente a los precios d'hoteles, cafés y restaurantes (+1,2%) y al tresporte (+1,1%), siguíos del ociu y la cultura con un aumentu del 0,7%, un 0,6% en melecina, un 0,4% la vivienda, un 0,2% n'otros sectores, y con un 0,1% les bebíes alcohóliques y tabacu, y los alimentos y bebíes non alcohóliques.

   De la mesma manera, caltiénense estables los precios de productos domésticos, comuncaciones y enseñanza (0,0%), mientres que sólo rexistra un descensu'l sector de vistíu y calzáu (0,6%).

   El sector que tien una cayida mayor no que va d'añu ye'l de vistíu y calzú (-16,7%), siguíu del d'alimentos y bebíes non alcohóliques (-3,7%); mientres que los que más subieron son bebíes alcohóliques y tabacu (+12,7), tresportes (+4,9%) y hoteles, cafés y restaurantes (3,6%).

   La tasa interañal que cuenta con mayor aumentu ye la d'alimentos y bebíes non alcohóliques (+13,4%); enseñanza (+4,7%), otros (2,3%), y hoteles, cafés y restaurantes (+2,0%) y productos domésticos (+1,2%). Per contra, el restu de sectores rexistraron un descensu de los precios nel últimu añu, con un -5,9% nel casu del tresporte,  un -3,3% n'alimentos y bebíes alcohóliques, y un 2,4% en vistíu y calzáu.

   La vivienda nel país contó un descensu del 1,6% nun añu, l'ociu y la cultura del 1,8%, les comunicaciones del 0,9% y la melecina del -0,1%.

   Nel conxuntu del estáu la inflación interañal modera'l so descensu n'agostu, tres rexistrar un nuevu mínimu históricu en xunetu (-1,4%) y encadena yá seis meses siguíos de cayíes.

Contador Estadistiques