El númberu d'oses con esbardos aumentó nel Cordal Cantábricu un 250% en diez años

El númberu d'oses pardes con esbardos incrementóse nel Cordal Cantábricu un 250% en diez años, concretamente ente 1998 y 2007, al pasar de seis a 21. D'esti total, la mayoría (18) llocalizáronse na población occidental, ente Lugo, y el suroeste d'Asturies, y el noroeste de Lleón, mientres que les trés restantes contabilizáronse ente la población oriental, que s'estiende pela montaña palentina, la oriental lleonesa, l'oriente asturianu y montes cántabros de Campoo de Suso y Liébana.

   Esi incrementu ye tovía mayor (600%) si se compara col añu 1994, cuando sólo hubo trés oses con esbardos, toes elles na parte occidental.

   Son datos de la Fundación Osu Pardu (FOP) espuestos na muestra itinerante qu'esta entidá organizó en collaboración con Adif (Alministrador d'Infraestructures Ferroviaries) y que pue visitase hasta'l próximu 16 de setiembre na estación de tren de Santander.

   'El oso pardo cantábrico, de especie perseguida a símbolo conservacionista' pon de manifiestu que l'últimu censu d'oses con críes, el correspondiente añu 2007, constitúi un "récor históricu" del censu de la especie y un "fiel espeyu" de la evolución positiva de la población, na que se duplicó'l númberu de femes reproductores en poco más d'una década.

   Asina, estímase que la población actual ronda los 130 exemplares, de los que 30 pertenecen a la población oriental.