Como yá ye tradicional tolos 8 de setiembre, xunto a los actos institucionales, otres fuerces polítiques entamen los sos propios actos de marcáu calter reivindicativu. Esta vegada son cuatro les cites d'esti tipu. N'Illas van aconceyar Izquierda Xunida, Los Verdes, Bloque por Asturies y Lliberación; en Xixón Unidá Nacionalista Asturiana; n'Uviéu Andecha Astur entama una manifestación a la que van asistir el Partíu Carlista, el PCPE y el sindicatu CSI, y en Villaviciosa Unión Asturianista organiza un actu politicu.

Izquierda Xunida, Los Verdes, Bloque por Asturies y Lliberación xúntense nel conceyu d'Illas, nel polideportivu de La Caizuela, a partir de les 13:00 hores baxo'l lema "Ante la crisis, más Asturies". Ehi habrá delles intervenciones polítiques y darréu habrá una espicha de baldre.

Otra de les cites sal de la estación de Renfe d'Uviéu, tamién a les 13.00 hores, y ye una manifestación convocada col lema "SOS Asturies" por diferentes organizaciones, ente elles Andecha Astur, Partido Comunista de los Pueblos de España, Partíu Carlista y el sindicatu CSI.

Unión Asturianista, coalición qu'axunta al Partíu Asturianista y a Unión Renovadora Asturiana, va celebrar el so actu conmemorativu del "Día de la Nación Asturiana" na capital del conceyu de Villaviciosa, del que ye alcalde Manuel Busto, miembru de la coalición. L'actu va entamar a les 13:00 hores na plaza de Xosé Caveda y Nava y va consistir "nun homenaxe al prócer villaviciosín y a la memoria asturianista de so pá y de los Xovellanos, durante’l cualu va haber sendos discursos políticos de Javier López Uría y de Xuan Xosé Sánchez Vicente".

UNA presenta periódicu y a la so nueva portavoz en Xixón

Finalmente Unidá Nacionalista Asturiana va celebrar el so actu nesti casu en L'Atalaya de Xixón, tamién a les 13.00, onde habra intervenciones polítiques y de siguío una espicha, música y xuegos tradicionales. Va aprovechase la ocasión pa presentar el primer númberu d'"UNA voz", órganu d'espresión de la organización que "naz col enclín de tresllada-y a la sociedá asturiana tanto les propuestes del nacionalismu asturianu como toles actividaes y actuaciones que tán faciéndose na organización".

Asimesmo'l grupu d'UNA-Xixón aprovechará los actos festivos y vindicativos pa presentar a la nueva vocera del conceyu, Yolanda Huergo. Huergo nació en Xixón en 1971, ye llicenciada en Derechu pola Universidá d'Uviéu y funcionaria de l'alministración nel conceyu de Siero. Asina mesmo milita activamente dende los años 90 nel movimientu de vindicación llingüística y en movimientos venceyaos cola defensa de los derechos humanos, según informen dende la organización nacionalista.