SUATEA pide que'l currículu d’Educación Infantil recueya llingua asturiana

|

El sindicatu educativu SUATEA afita qu'esti 8 setiembre "deberíemos festexar que les nuestres instituciones pasu ente pasu fueron construyendo’l país contribuyendo al so desarrollu socio-económicu y consolidando la so cultura propia; pero en bien poco o más bien en nada se collaboró nello dende l’ámbitu educativu", y pide la oficialidá del asturianu y la creación de la especialidá de llingua asturiana ente'l profesoráu.

SUATEA conseña que'l cursu pasáu algamóse que "la nuestra llingua entrare nos planes d’estudiu de la Universidá na facultá de Filoloxía y Maxisteriu, lo que permitirá que se siga formando’l profesoráu pa enseñar en tolos niveles educativos obligatorios. Sicasí, esti llogru ye parcial y escasu si tenemos en cuenta les reivindicaciones históriques  de la so presencia na Universidá, pero supón el primer pasu d’una implantación más amplia nel currículu universitariu".

Según el sindicatu "paradóxicamente, les titulaciones relacionaes cola nuestra llingua daes pola universidá son y sedrán papel moyao si nun se reconoz la especialidá de Llingua Asturiana y Gallego-Asturiano. Agora mesmo, el profesoráu con esta especialidá ye discrimináu llaboralmente en tolos ámbitos del sistema educativu, pues nun ye valorada n’igualdá coles otres sí reconocíes: minusvalórase nos baremos d’oposición, tórgase l’accesu a puestos de trabayu del ámbitu socio-llingüísticu en Secundaria, nun se convoquen oposiciones d’esta  especialidá … D’esta situación ye responsable’l Gobiernu asturianu."

Discriminación del alumnáu

SUATEA denuncia asimesmo "la discriminación que tamién sufre l’alumnáu de Primaria y Secundaria cuando pa poder recibir clases de la nuestra llingua tienen que constituir grupos con un númberu mínimu de persones. L’alumnáu d’Infantil nin siquiera se-y reconoz el derechu recibiles, pues el Currículu d’esta etapa nun recueye nengún conteníu de Llingua Asturiana o Gallego-Asturiano". SUATEA amesta que "tien interpuestu un recursu contra él pendiente de resolver xudicialmente".

Finalmente demanden la "oficialidá del asturianu", que "les places de Llingua Asturiana y Gallego-Asturiano pasen a formar parte de les plantiyes orgániques de los centros, la creación de la especialidá y la convocatoria d'oposiciones", que’l "currículu d’Educación Infantil recueya la nuestra llingua y que demientres nun lo faga s’atiendan toles demandes d’escolarización  nesta  etapa fundamental pal deprendimientu en xeneral y el llingüísticu en particular" y que "nos centros s’axeiten Planes Llingüísticos que dean un tratamientu integráu y coordináu de toles llingües que s’enseñen y onde la nuestra llingua seya vehicular en delles aries".

Contador Estadistiques