Skip to content
Entamu

PAS y Andecha aconceyaron p'afitar una futura collaboración conxunta

Setiembre 7, 2009 por Pablo R. Alonso

Un conceyu celebráu ente Mariu Arbesú, representante d'Andecha Astur y Lluis Anxel Núñez, del Partíu Asturianista, sirvió pal intercambiu de puntos de vista alrodiu de la situación política y económica del nuesu país y p'abrir una canal de comunicación de cara a futures collaboraciones ente PAS y AA, según informen dambes organizaciones.
 
En palabres de la Executiva Nacional del PAS, esti alcuentru sirvió pa "valorar la posibilidá de, dende’l respetu a los sos compromisos y dende’l puntu de partida de los sos programes y trayectoria histórica, buscar caminos de coincidencia y actuación nun futuru prósimu".

Dende'l PAS conseñen que'l "dificil panorama económicu, políticu, social, y cultural asturianu, onde los 'chiringuitos' medren como champiñones, onde nun paramos de consiguir 'récords' negativos, y onde los vendepatries, cuando gobiernen o son socios de gobiernu en Madrid y/o Asturies, apoyen a les demás comunidaes en detrimentu d’Asturies y los asturianos, y sólo si tán na oposición faen como que tán a favor de los intereses de los asturianos, cuando, en realidá, lo único que faen ye meter ruidu p’ayudar a la política xeneral de los suyos en Madrid, qu’incluye siempre decisiones contraries a los intereses de los asturianos" fai que dambes organizaciones sían "coincidentes nestos puntos y otros munchos", lo qu'amestao "a los esfuerzos de 'sumar por y p'Asturies' y dientru de los actos patrióticos del Día de la Nación Asturiana, Partíu Asturianista (PAS) y Andecha Astur (AA) aconceyáronse p’afondar nestos puntos en común".

Pela so parte Andecha Astur fala de la firma "d'un alcuerdu de collaboración ente les dos organizaciones basáu nel intercambiu d’información y na táutica de xunidá d’aición". Un alcuerdu qu'espresa  “la voluntá de les dos partes de caltener una comunicación permanente, intercambiar información y buscar puntos d’analís políticu compartios sobre la rialidá d’Asturies asina como, a partir de los elementos de coincidencia, entamar iniciatives de trabayu conxuntu sobre problemátiques concretes dende’l respetu a los sos compromisos particulares y quedando dende’l entamu asegurada la soberanía de les organizaciones pa continuar coles sos dinámiques y actividaes propies”.

Comparte...                                
Enllaz permanente

Comentarios

Tarde como siempre.

Setiembre 8, 2009 por asturian, hai 51 selmanes 2 díes
Id del comentariu510

Tarde como siempre. L'asturianismu ya ta muertu. Nunca enxamás PAS-URAS, AA o UNA van sacar ná. El BPA sobrevivirá lo que dure IX (que tamién va camín del cementeriu).
Queden PP y PSOE, el sartén y les brases.

la verda...

Setiembre 8, 2009 por colec, hai 51 selmanes 2 díes
Id del comentariu505

Ta tou mui bien. Son válides toles opiniones, pero:
 
¿Por qué los cincu conceyales del PAS son más que los ONCE actuales d'Unión Asturianista?
 
¿Por qué ...un alcalde de chamba, el de Nava, con un solo conceyal, ye más que los  DOS  alcaldes actuales d'Unión Asturianista, con varios conceyales toos ellos?
 
Eso sí que son matemátiques suxetives o, si se quier, "el mayor enemigu de la verdá nun ye la mentira, sinon el prexuiciu"..
 
Y para finar: La importancia de l'alcaldía de Nava basose nos más de 2.000 millones de pesetes que los presupuestos asturianos -frutu de los alcuerdos del PAS con Marqués- punxieron en Nava. D'otra forma, ¿quién diba a haber notáu qu'había un alcalde asturianista en Nava?
 
Firma: Cada un, el so ADN.

Entos tamién sabrás que Nava

Setiembre 8, 2009 por Belenos, hai 51 selmanes 2 díes
Id del comentariu507

Entos tamién sabrás que Nava foi el primer conceyu que reguló l'usu de la llingua asturiana de los navetos y navetes cola casa conceyu, que Nava foi un de los primeros conceyos en facer normalización de la llingua a nivel social, y neso daqué tuvieron que ver les politiques entamaes nel so día, de toes formes sumar sabemos toos y toes, el problema ye si la suma de conceyales  y alcaldies vien de la man tamién con politiques o namai numberinos de les estadistiques pa ver quien ye'l gayu la quintana. 

Esto yá ye otra cosa.

Setiembre 7, 2009 por el xanu, hai 51 selmanes 4 díes
Id del comentariu498

La noticia hai que la tomar con prudencia y ensin echar campanes al vuelu. Pero la firma ta ehí y con semeya d'apretón de manes incluida. Asina que nesta ocasión namas que cabe felicitar a los firmantes. Y esperar que'l tiempu confirme'l pasu dau.

l'acabación

Setiembre 7, 2009 por nordés, hai 51 selmanes 3 díes
Id del comentariu499

A mi lo que me paez ye l'enésimu síntoma del debilitamientu del PAS como proyectu poliíticu, que va camín de la desaparición. Dende la pérdida del diputáu van nun viaxe descendente allargau pola alianza con URAS. Agora toca Andecha, nuna supuesta alianza que fai cinco años yera impensable dende'l PAS y que nun s'esplica si nun ye por prolongar una agonía que dura yá diez años. Y nun lo digo con satisfacción sinón con pena, yo fui votante del PAS y durante dellos años creí nel proyectu.
 
Esta semeya ye la viva representación del viaxe a nenguna parte del PAS y del autubombu d'Andecha, especialistes nello como siempre.
 
Xunir declive y marxinalidá a mi nun me paez una bona noticia, la verdá. Siento ser tan duru pero prefiero ser realista.

Cuestión de supervivencia.

Setiembre 7, 2009 por el xanu, hai 51 selmanes 3 díes
Id del comentariu500

La reallidá y el pragmatismu imponen la so llei. A les actuales organizaciones nacionalistes/asturianistes nun-yos queda otru remediu que tender pontes d'esti tipu o asemeyaes pa salir del pielgu o resignase a desaparecer nel plazu d'unos años. Cuenten, amás, col vientu favoratible d'una corriente xeneralizada d'opinión que demanda acercamentos y alcuerdos fartuca de dixebres y enfrentamientos escosos. Una cuestión de supervivencia política que namás que'l pasu del tiempu va dicir si frutia o non. Como dixi eantes, hai que siguilo too con muncha prudencia y ensin zapicar nel infantilismu de que, a partir d'agora, va venir too rodao.

Seamos realistes

Setiembre 7, 2009 por nordés, hai 51 selmanes 3 díes
Id del comentariu501

Bien, seamos realistes:
 
El PAS ta en caída llibre dende'l 99. Perdío'l diputáu, perdió alcaldíes importantisimes como la de Nava, perdió conceyales y votos, y un capital humanu que nun te quiero contar. Agora por nun tener nin sede tienen en Xixón, la so plaza "fuerte".
 
Andecha, venti años nel mundín y nin un misere conceyal, nin siquiera onde trabayen y los conocen como en Noreña (igual ye porque los conocen), engarraos internamente etc.
 
Xuntar dos equipos de tercera división nun te fai ún de primera (nin de segunda).
 
Queden entá unos años de travesía del desiertu. Y digolo asina y crudamente porque depués la xente faise ilusiones, inventa pelicules y darréu llega'l fostión, la desilusión y el marchar pa casa. Nada me prestaría mas qu'equivocame, en serio, pero como nesti país conocémonos toos y yá se sabe lo qu'hai...
 
 

Pal que nun tea enteráu de

Setiembre 8, 2009 por Gabis, hai 51 selmanes 3 díes
Id del comentariu504

Pal que nun tea enteráu de como tán por dientro les coses, esta noticia de xuru que lu enllena esperances y optimismu. Pero cuando una casa que ta cayendo se xunta a otra que yá ye un solar, el resultáu nun ye una casona d'indianos. Son les mesmes sigles, la mesma xente, la mesma manera facer política, revélaseme más una operación pa consumu internu del mundín nacionaliegu qu'un proyectu renováu pa ilusionar a la sociedá asturiana. Una manera dicir: "¿nun quereis unidá?, pues toma-y unidá", politiquina de micorpolítica. ¿Vemos realmente una trescendencia grande ya ilusionante nesta semeya?, quixiere enquivocame pero dos ciclistes pinchaos xuntos nun son a ganar na meta L'Angliru.